Vassaṃ upagamma vattapaṭivattaṃ pūrayamāno vassaṃ vasitvā niggatoti lokasammatasenāsanasaṃvaṇṇanādīhi upāyehi lokaṃ paripācetuṃ paṭibalehi jātakādīsu katapariccayehi sarasampannehi pāpabhikkhūhi saṃvaṇṇiyamānaguṇo hutvā satena vā sahassena vā parivuto .pe. Bhesajjaparikkhārānaṃ. Ayaṃ bhikkhave paṭhamo mahācoroti ayaṃ sandhicchedakādicorako viya na ekaṃ kulaṃ na dve athakho mahājanaṃ vañcetvā catuppaccayaggahaṇato paṭhamo mahācoroti veditabbo. Ye pana suttantikā vā ābhidhammikā vā vinayadharā vā bhikkhū bhikkhācāre asampajjamāne pāliṃ vācentā aṭṭhakathaṃ kathentā anumodanāya dhammakathāya iriyāpathasampattiyā ca lokaṃ pasādentā janapadacārikaṃ caranti sakkatā garukatā mānitā pūjitā apacitā te tantippaveṇighaṭanakā sāsanajotakāti veditabbā. Tathāgatappaveditanti tathāgatena paṭividdhaṃ paccakkhakataṃ jānāpitaṃ vā. Attano dahatīti parisamajjhe pāliñca aṭṭhakathañca saṃsandetvā madhurena saddena pasādanīyaṃ suttantaṃ kathetvā dhammakathāvasāne acchariyabbhutajātena viññujanena aho bhante pāli ca aṭṭhakathā ca suparisuddhā kassa santike uggaṇhitthāti pucchito ko amhādise uggaṇhāpetuṃ samatthoti ācariyaṃ anuddisitvā attanā paṭividdhaṃ sayambhūñāṇādhigataṃ dhammavinayaṃ pavedeti. Ayaṃ tathāgatena satasahassakappādhikāni cattāri asaṅkheyyāni pāramiyo pūretvā kicchena kasirena paṭividdhadhammatthenako dutiyo mahācoro. Suddhaṃ brahmacārinti khīṇāsavaṃ bhikkhuṃ. Parisuddhaṃ brahmacariyaṃ carantanti nirupakkilesaṃ seṭṭhacariyaṃ carantaṃ. Aññaṃpi vā anāgāmiṃ ādiṃ katvā yāva sīlavantaṃ puthujjanaṃ avipaṭisārādivatthukaṃ parisuddhaṃ brahmacariyaṃ carantaṃ. Amūlakena abrahmacariyena anuddhaṃsetīti tasmiṃ puggale avijjamānena antimavatthunā anuvadati codeti. Ayaṃ vijjamānaguṇamakkhī ariyaguṇatthenako tatiyo mahācoro. Garubhaṇḍāni garuparikkhārānīti yathā adinnādāne caturo janā saṃvidhāya garubhaṇḍaṃ avāharunti ettha pañcamāsakagghanakaṃ garubhaṇḍanti vuccati idha na evaṃ athakho pañcimāni bhikkhave avissajjanīyāni na vissajjetabbāni saṅghena vā gaṇena vā puggalena vā vissajjitānipi avissajjitāni honti yo vissajjeyya āpatti thullaccayassa katamāni pañca ārāmo ārāmavatthu .pe. Dārubhaṇḍaṃ mattikābhaṇḍanti vacanato avissajjitabbattā garubhaṇḍāni pañcimāni bhikkhave avebhaṅgiyāni na vibhajitabbāni saṅghena vā gaṇena vā puggalena vā vibhattānipi avibhattāni honti yo vibhajeyya āpatti thullaccayassa katamāni pañca ārāmo ārāmavatthu .pe. Dārubhaṇḍaṃ mattikābhaṇḍanti vacanato avebhaṅgikattā sādhāraṇaparikkhārabhāvena garuparikkhārāni. Ārāmo ārāmavatthūtiādīsu yaṃ vattabbaṃ taṃ sabbaṃ pañcimāni bhikkhave avissajjiya nīti khandhake āgatasuttavaṇṇanāyameva bhaṇissāma. Tehi gihī saṅgaṇhātīti tāni datvā gihī saṅgaṇhāti anuggaṇhāti. Upalāpetīti aho amhākaṃ ayyoti evaṃ lapanake anubandhanake sinehe karoti. Ayaṃ avissajjiyaṃ avebhaṅgiyañca garuparikkhāraṃ tathābhāvato thenetvā gihisaṅgaṇhanako catuttho mahācoro. So ca panāyaṃ imaṃ garubhaṇḍaṃ kulasaṅgaṇhanatthaṃ vissajjento kuladūsakadukkaṭaṃ āpajjati pabbājanīyakammāraho ca hoti bhikkhusaṅghaṃ abhibhavitvā issaravatāya vissajjento thullaccayaṃ āpajjati theyyacittena vissajjento bhaṇḍaṃ agghāpetvā kāretabboti. Ayaṃ aggo mahācoroti ayaṃ imesaṃ mahācorānaṃ jeṭṭhacoro iminā sadiso coro nāma natthi yo pañcindriyaggahaṇātītaṃ atisaṇhaṃ sukhumaṃ lokuttaradhammaṃ theneti. Kiṃ pana sakkā lokuttaradhammo hiraññasuvaṇṇādīni viya vañcetvā thenetvā gahetunti. Na sakkā. Tenevāha yo asantaṃ abhūtaṃ uttarimanussadhammaṃ ullapatīti. Ayaṃ hi attani asantaṃ dhammaṃ kevalaṃ atthi mayhaṃ esoti ullapati na pana sakkoti ṭhānā cāvetuṃ attani vā saṃvijjamānaṃ kātuṃ. Atha kasmā coroti vuttoti. Yasmā taṃ ullapitvā asantasambhāvanāya uppanne paccaye gaṇhāti evaṃ hi gaṇhatā te paccayā sukhumena upāyena vañcetvā thenetvā gahitā honti. Tenevāha taṃ kissa hetu theyyāya vo bhikkhave raṭṭhapiṇḍo bhuttoti. Ayañhi ettha attho yaṃ avocumhā ayaṃ aggo mahācoro yo asantaṃ abhūtaṃ uttarimanussadhammaṃ ullapatīti taṃ kissa hetu