Kena kāraṇena etaṃ avocumhāti ce theyyāya vo bhikkhave raṭṭhapiṇḍo bhuttoti bhikkhave yasmā vo tena raṭṭhapiṇḍo theyyacittena bhutto hoti. Ettha hi vokāro ye hi vo ariyā araññavanapaṭṭhānītiādīsu viya padapūraṇamatte nipāto. Tasmā tumhehi bhuttoti evamassa attho na daṭṭhabbo. Idāni tamevatthaṃ gāthāhi vibhūtataraṃ karonto aññathā santantiādimāha. Tattha aññathā santanti aparisuddhakāyasamācārādikena aññena ākārena santaṃ. Aññathā yo pavedayeti parisuddhakāya- samācārādikena aññena ākārena yo pavedeyya paramaparisuddho ahaṃ atthi me abbhantare lokuttaradhammoti evaṃ jānāpeyya. Pavedetvā ca pana tāya pavedanāya uppannaṃ bhojanaṃ arahā viya bhuñjati. Nikacca kitavasseva bhuttaṃ theyyena tassa tanti nikaccāti vañcetvā aññathā santaṃ aññathā dassetvā agumbāgacchabhūtameva sākhāpalāsapallavādicchādanena gumbamiva gacchamiva ca attānaṃ dassetvā. Kitavassevāti vañcakassa kerāṭikassa gumbagacchasaññāya araññe āgatāgate sakuṇe gahetvā jīvitakappakassa sākuṇikasseva. Bhuttaṃ theyyena tassa tanti tassāpi anarahantasseva sato arahantabhāvaṃ dassetvā laddhaṃ bhojanaṃ bhuñjato yaṃ taṃ bhuttaṃ taṃ yathā sākuṇikakitavassa nikacca vañcetvā sakuṇaggahaṇaṃ evaṃ manusse vañcetvā laddhassa bhojanassa bhuttattā theyyena bhuttaṃ
Nāma hoti. Imaṃ pana atthavasaṃ ajānantā ye evaṃ bhuñjanti kāsāvakaṇṭhā .pe. Nirayaṃ te upapajjare. Kāsāvakaṇṭhāti kāsāvena veṭhitakaṇṭhā. Ettakameva ariyaddhajadhāraṇamattaṃ yesaṃ sāmaññaṃ aññaṃ natthīti vuttaṃ hoti. Bhavissanti kho panānanda anāgatamaddhānaṃ gotrabhuno kāsāvakaṇṭhāti evaṃ vuttadussīlānaṃ etaṃ adhivacanaṃ. Pāpadhammāti lāmakadhammā. Asaññatāti kāyādīhi asaññatā. Pāpāti lāmakapuggalā. Pāpehi kammehīti tehi karaṇakāle ādīnavaṃ adisvā katehi paravañcanādīhi pāpakammehi. Nirayante upapajjareti nirassādaṃ duggatiṃ te upapajjanti. Tasmā seyyo ayoguḷoti gāthā. Tassattho sacāyaṃ dussīlo asaññato icchācāre ṭhito kuhanāya lokavañcako puggalo tattaṃ aggisikhūpamaṃ ayoguḷaṃ bhuñjeyya ajjhohareyya tassa yañcetaṃ raṭṭhapiṇḍaṃ bhuñjeyya yañcetaṃ ayoguḷaṃ tesu dvīsu ayoguḷova bhutto seyyo sundarataro paṇītataro ca bhaveyya na hi ayoguḷassa bhuttattā samparāye sabbaññutaññāṇenāpi dujjānaparicchedaṃ dukkhaṃ anubhavati evaṃ paṭiladdhassa pana raṭṭhapiṇḍassa bhuttattā samparāye vuttappakāraṃ dukkhaṃ anubhoti ayaṃ hi koṭippatto micchājīvoti.