Tīhākārehīti sampajānamusāvādassa aṅgabhūtehi tīhi kāraṇehi. Pubbevassa hotīti pubbabhāgeyeva assa puggalassa evaṃ hoti musā bhaṇissanti. Bhaṇantassa hotīti bhaṇamānassa hoti. Bhaṇitassa hotīti bhaṇite assa hoti. Yaṃ vattabbaṃ tasmiṃ vutte hotīti attho. Athavā bhaṇitassāti vuttavato niṭṭhitavacanassa hotīti. Evaṃ yo pubbabhāgepi jānāti bhaṇantopi jānāti pacchāpi jānāti musā mayā bhaṇitanti so paṭhamaṃ jhānaṃ samāpajjinti bhaṇanto pārājikaṃ āpajjatīti ayamettha attho dassito. Kiñcāpi dassito athakho ayamettha viseso. Pucchā tāva hoti musā bhaṇissanti pubbabhāgo atthi musā mayā bhaṇitanti pacchābhāgo natthi vuttamattameva hi koci pamussati kintassa pārājikaṃ hoti na hotīti. Sā evaṃ aṭṭhakathāsu vissajjitā pubbabhāge musā bhaṇissanti ca bhaṇantassa musā bhaṇāmīti ca jānato pacchābhāge musā mayā bhaṇitanti na sakkā na bhavituṃ sacepi na hoti pārājikameva. Purimameva hi Aṅgadvayaṃ pamāṇaṃ. Yassāpi pubbabhāge musā bhaṇissanti ābhogo natthi bhaṇanto pana musā bhaṇāmīti jānāti bhaṇitepi musā mayā bhaṇitanti jānāti so āpattiyā na kāretabbo. Pubbabhāgo hi pamāṇataraṃ tasmiṃ asati davābhaṇitaṃ vā ravābhaṇitaṃ vā hotīti. Ettha ca taṃñāṇatā ca ñāṇasamodhānañca pariccajitabbaṃ. Taṃ ñāṇatā pariccajitabbāti yena cittena musā bhaṇissanti jānāti teneva musā bhaṇāmīti ca musā mayā bhaṇitanti ca jānātīti evaṃ ekacitteneva tīsu khaṇesu jānātīti ayaṃ taṃ ñāṇatā pariccajitabbā. Na hi sakkā teneva cittena cittaṃ jānituṃ yathā na sakkā teneva asinā so asi chinditunti. Purimaṃ purimaṃ pana cittaṃ pacchimassa pacchimassa cittassa tathā uppattiyā paccayo hutvā nirujjhati. Tenetaṃ vuccati

pamāṇaṃ pubbabhāgova tasmiṃ sati na hessati

sesadvayanti natthetaṃ iti vācā tivaṅgikāti. Ñāṇasamodhānaṃ pariccajitabbanti etāni tīṇi cittāni ekakkhaṇe uppajjantīti na gahetabbāni. Idaṃ hi cittaṃ nāma

aniruddhamhi paṭhame na uppajjati pacchimaṃ