nirantaruppajjanato ekaṃ viya pakāsatīti. Ito paraṃ pana yvāyaṃ paṭhamaṃ jhānaṃ samāpajjinti sampajānamusā bhaṇati yasmā so natthi me paṭhamaṃ jhānanti evaṃ diṭṭhiko hoti tassa hi attheva ayaṃ laddhi tathā natthi me paṭhamaṃ jhānanti Evamassa khamati ceva ruccati ca evaṃsabhāvameva cassa cittaṃ natthi me paṭhamaṃ jhānanti yadā pana musā vattukāmo hoti tadā taṃ diṭṭhiṃ vā diṭṭhiyā saha khantiṃ vā diṭṭhikhantīhi saddhiṃ ruciṃ vā diṭṭhikhantirucīhi saddhiṃ bhāvaṃ vā vinidhāya nikkhipitvā paṭicchādetvā abhūtaṃ katvā bhaṇati tasmā tesampi vasena aṅgabhedaṃ dassetuṃ catūhi ākārehītiādi vuttaṃ. Parivāre ca aṭṭhaṅgiko musāvādoti vuttattā tattha adhippetāya saññāya saddhiṃ aññopi idha aṭṭhahākārehīti eko nayo yojetabbo. Ettha ca vinidhāya diṭṭhinti balavadhammavinidhānavasena vuttaṃ. Vinidhāya khantintiādīni tato dubbaladubbalānaṃ vinidhānavasena. Vinidhāya saññanti idaṃ panettha sabbadubbaladhammavinidhānasaññāmattampi nāma. Avinidhāya sampajānamusā bhaṇissatīti netaṃ ṭhānaṃ vijjati. Yasmā pana samāpajjissāmītiādinā anāgatavacanena pārājikaṃ na hoti tasmā samāpajjintiādīni atītavattamānapadānevapāṭhevuttānītiveditabbāni.

{207} Ito paraṃ sabbampi imasmiṃ suddhikamahāvāre uttānatthameva. Na hettha atthi yaṃ iminā vinicchayena na sakkā bhaveyya viññātuṃ ṭhapetvā kilesappahānapadassa padabhājane rāgo me catto vantotiādīnaṃ padānaṃ atthaṃ. Svāyaṃ vuccati. Ettha hi cattoti idaṃ sakabhāvapariccajanavasena vuttaṃ. Vantoti idaṃ puna anādiyanabhāvadassanavasena. Muttoti idaṃ santatito vimocanavasena. Pahīnoti idaṃ

Muttassāpi kvaci anavaṭṭhānadassanavasena. Paṭinissaṭṭhoti idaṃ pubbe ādinnapubbassa paṭinissaggadassanavasena. Ukkheṭitoti idaṃ ariyamaggena uttāsitattā puna anālīyanabhāvadassanavasena. Svāyamattho saddasatthato pariyesitabbo. Samukkheṭitoti idaṃ suṭṭhu uttāsetvā aṇusahagatassāpi puna anālīyanabhāvadassanavasena vuttanti.