Suddhikavārakathā niṭṭhitā.
{215} Vattukāmavārepi tīhākārehītiādīnaṃ attho vārapeyyālappabhedo ca sabbo idha vuttanayeneva veditabbo. Kevalaṃ hi yaṃ idaṃ mayā virajjhitvā aññaṃ vattukāmena aññaṃ vuttaṃ tasmā natthi mayhaṃ āpattīti evaṃ okāsagavesakānaṃ pāpapuggalānaṃ okāsanisedhanatthaṃ vutto. Yatheva hi buddhaṃ paccakkhāmīti vattukāmo dhammaṃ paccakkhāmītiādīsu sikkhāpaccakkhānapadesu yaṃ vā taṃ vā vadanto khette otiṇṇattā sikkhāpaccakkhātakova hoti evaṃ paṭhamajjhānādiuttarimanussadhammapadesu yaṅkiñci ekaṃ vattukāmo tato aññaṃ yaṃ vā taṃ vā vadantopi khette otiṇṇattā pārājikova hoti sacepi yassa vadati so tamatthaṃ taṃkhaṇaṃyeva jānāti. Jānanalakkhaṇañcettha sikkhāpaccakkhāne vuttanayeneva veditabbaṃ. Ayaṃ pana viseso. Sikkhāpaccakkhānaṃ hatthamuddhāya sīsaṃ na otarati. Idaṃ abhūtārocanaṃ hatthamuddhāyapi otarati. Yo hi hatthavikārādīhi aṅgapacacaṅgacopanehi abhūtaṃ uttarimanussadhammaṃ viññattipathe ṭhitassa puggalassa ārocesi so ca taṃ atthaṃ jānāti pārājikova Hoti. Atha pana yassa āroceti so na jānāti vā kiṃ ayaṃ bhaṇatīti saṃsayaṃ vā āpajjati ciraṃ vīmaṃsitvā vā pacchā jānāti apaṭivijānanto icceva saṅkhaṃ gacchati. Evaṃ apaṭivijānantassa vutte thullaccayaṃ hoti. Yo pana jhānādīni attanā adhigamanavasena vā uggahaparipucchādivasena vā na jānāti kevalaṃ jhānanti vā vimokkhoti vā vacanamattameva sutaṃ hoti sopi tena vutte jhānaṃ kira samāpajjinti esa vadatīti yadi ettakamattampi jānāti jānāticceva saṅkhaṃ gacchati tassa vutte pārājikameva. So ekassa vā dvinnaṃ vā bahūnaṃ vā niyamitāniyamitavasena viseso sabbopi sikkhāpaccakkhānakathāyaṃ vuttanayeneva veditabboti.
Vattukāmavārakathā niṭṭhitā.
{220} Paccayapaṭisaṃyuttavārepi sabbaṃ vārapeyyālappabhedaṃ pubbe āgatapadānañca atthaṃ vuttanayeneva ñatvā pālikkamo tāva evaṃ jānitabbo. Ettha hi yo te vihāre vasi yo te cīvaraṃ paribhuñji yo te piṇḍapātaṃ paribhuñji yo te senāsanaṃ paribhuñji yo te gilānapaccayabhesajjaparikkhāraṃ paribhuñjīti ime pañca paccattavacanavārā yena te vihāro paribhuttotiādayo pañca karaṇavacanavārā yaṃ tvaṃ āgamma vihāraṃ adāsītiādayo pañca upayogavacanavārā vuttā tesaṃ vasena idha vuttena suññāgārapadena saddhiṃ pubbe vuttesu paṭhamajjhānādīsu sabbapadesu