{230} Yasmā mātugāmo nāma attano phasse anissaro sā ca taṃ sāmikassa santakaṃ phassaṃ thenetvā paresaṃ abhiratiṃ uppādesi tasmā kammasabhāgatāya sukhasamphassaṃ dhaṃsitvā dukkhasamphassaṃ anubhavituṃ nicchavitthī hutvā uppannā. Maṅguḷitthīvatthusmiṃ. Maṅguḷinti virūpaṃ duddasikaṃ vibhacchaṃ. Sā kira ikkhaṇikākammaṃ yakkhadāsīkammaṃ karontī iminā ca iminā ca evaṃ balikamme kate ayannāma tumhākaṃ vuḍḍhi bhavissatīti mahājanassa gandhapupphādīni vañcanāya gahetvā mahājanaṃ duddiṭṭhiṃ micchādiṭṭhiṃ gaṇhāpesi. Tasmā tāya kammasabhāgatāya gandhapupphādīnaṃ thenitattā duggandhā duddassanassa gāhitattā duddasikā virūpā vibhacchā hutvā nibbattā. Okilinitthīvatthusmiṃ. Uppakkaṃ okiliniṃ okīraṇinti sā kira Aṅgāracittake nipannā vipphandamānā parivattamānā paccati tasmā uppakkā ceva hoti kharena agginā pakkasarīrā ca okilinī ca kilinnasarīrā ca bindubindūnissā sarīrato paggharanti okīraṇī ca aṅgāraparikiṇṇā. Tassā hi heṭṭhatopi kiṃsukapupphavaṇṇā aṅgārā ubhayapassesupi ākāsatopissā upari aṅgārā patanti. Tena vuttaṃ uppakkaṃ okiliniṃ okīraṇinti. Sā issāpakatā sapattiṃ aṅgārakaṭāhena okīrati. Tassa kira rañño ekā nāṭakinī aṅgārakaṭāhaṃ samīpe ṭhapetvā gattato udakañca puñchati pāṇinā ca sedaṃ karoti. Rājā tāya saddhiṃ kathañca karoti upari tuṭṭhākārañca dasseti. Aggamahesī taṃ asahamānā issāpakatā hutvā acirapakkantassa rañño taṃ aṅgārakaṭāhaṃ gahetvā tassā upari aṅgāre okīri. Sā taṃ kammaṃ katvā tādisaṃyeva vipākaṃ paccanubhavituṃ petaloke nibbattā. Coraghātavatthusmiṃ. So rañño āṇāya dīgharattaṃ corānaṃ sīsāni chinditvā petaloke nibbattanto asīsakabandhaṃ hutvā nibbatti. Bhikkhuvatthusmiṃ. Pāpabhikkhūti lāmakabhikkhu. So kira lokassa saddhādeyye cattāro paccaye paribhuñjitvā kāyavacīdvārehi asaññato bhinnājīvo cittakeḷiṃ kīḷanto vicari. Tato ekaṃ buddhantaraṃ niraye paccitvā petaloke nibbattanto bhikkhusadiseneva attabhāvena nibbatti. Bhikkhunīsikkhamānāsāmaṇerasāmaṇerīvatthūsupi ayameva vinicchayo.