Kasmā. Yasmā kapimiddhapareto passati. Vuttaṃ hetaṃ kapimiddhapareto kho mahārāja supīnaṃ passatīti 1-. Kapimiddhaparetoti makkaṭaniddāya yutto. Yathā hi makkaṭassa niddā lahuparivattā hoti evaṃ yā niddā punappunaṃ kusalādicittavokiṇṇattā lahuparivattā yassā pavattiyaṃ punappunaṃ bhavaṅgato uttaraṇaṃ hoti tāya yutto supinaṃ passati. Tenāyaṃ supino kusalopi hoti akusalopi abyākatopi. Tattha supinante cetiyavandanadhammassavanadhammadesanādīni karontassa kusalo pāṇātipātādīni karontassa akusalo dvīhi aṅgehi mutto āvajjanatadārammaṇakkhaṇe abyākatoti veditabbo. Svāyaṃ dubbalavatthukattā cetanāya paṭisandhiṃ ākaḍḍhituṃ asamattho pavatte pana aññehi kusalākusalehi upatthambhito vipākaṃ deti. Kiñcāpi vipākaṃ deti athakho avisaye uppannattā abbohārikāva supinantacetanā. Tenāha ṭhapetvā supinantanti.

Saṅghādisesoti imassa āpattinikāyassa nāmaṃ. Tasmā yā aññatra supinantā sañcetanikā sukkavisaṭṭhi ayaṃ saṅghādiseso nāma āpattinikāyoti evamettha sambandho veditabbo. Vacanattho panettha saṅgho ādimhi ceva sese ca icchitabbo assāti saṅghādisesoti. Kiṃ vuttaṃ hoti. Imaṃ āpattiṃ āpajjitvā vuṭṭhātukāmassa yantaṃ āpattivuṭṭhānaṃ tassa ādimhi ceva parivāsanatthāya ādito sese majjhe mānattadānatthāya mūlāya paṭikkassanena vā saha mānattadānatthāya avasāne abbhānatthāya ca saṅgho icchitabbo.

Na hettha ekampi kammaṃ vinā saṅghena sakkā kātunti. Saṅgho ādimhi ceva sese ca icchitabbo assāti saṅghādiseso. Byañjanaṃ pana anādayitvā atthameva dassetuṃ saṅghova tassā āpattiyā parivāsaṃ deti mūlāya paṭikassati mānattaṃ deti abbheti na sambahulā na ekapuggalo tena vuccati saṅghādisesoti idamassa padabhājanaṃ.

Saṅghādisesoti yaṃ vuttaṃ taṃ suṇohi yathākathaṃ