Na muñcati tāva ekā va āpatti. Abhinippīḷanāya vatthena vā ābharaṇena vā saddhiṃ nippīḷayato aṅgaṃ aphusantassa thullaccayaṃ phusantassa saṅghādiseso. Ekappayogena ekā āpatti nānāpayogena nānā. Gahaṇacchupanesu aññaṃ kiñci vikāraṃ akarontopi gahitamattaphuṭṭhamattenāpi āpattiṃ āpajjati.
Evametesu āmasanādīsu ekenāpi ākārena ajjhācarato itthiyā itthīsaññissa saṅghādiseso. Vematikassa thullaccayaṃ. Paṇḍakapurisatiracchānagatasaññissāpi thullaccayameva. Paṇḍake paṇḍakasaññissa thullaccayaṃ. Vematikassa dukkaṭaṃ. Purisatiracchānagataitthīsaññissa dukkaṭameva. Purise purisasaññissāpi vematikassāpi itthīpaṇḍakatiracchānagatasaññissāpi dukkaṭameva. Tiracchānagatepi sabbākārena dukkaṭamevāti. Imā ekamūlakanaye vuttā āpattiyo sallakkhetvā iminā ca upāyena dve itthiyo dvinnaṃ itthīnanti ādivasena vutte dvimūlakanayepi dviguṇā āpattiyo veditabbā. Yathā ca dvīsu itthīsu dve saṅghādisesā evaṃ sambahulāsu sambahulā veditabbā. Yo hi ekato ṭhitā sambahulā itthiyo bāhāhi parikkhipitvā gaṇhāti so yattakā itthiyo phuṭṭhā tāsaṃ gaṇanāya saṅghādisese āpajjati. Majjhagatānaṃ gaṇanāya thullaccaye. Tā hi tena kāyapaṭibaddhena āmaṭṭhā honti. Yo pana sambahulānaṃ aṅguliyo vā kese vā ekato katvā gaṇhāti so aṅguliyo ca kese ca agaṇetvā itthiyo gaṇetvā saṅghādisesehi kāretabbo. Yāsañca itthīnaṃ aṅguliyo vā kesā vā majjhagatā honti tāsaṃ gaṇanāya thullaccaye āpajjati. Tā hi tena kāyapaṭibaddhena āmaṭṭhā honti. Sambahulā pana itthiyo kāyapaṭibaddhehi rajjuvatthādīhi parikkhipitvā gaṇhanto sabbāsaṃyeva antoparikkhepagatānaṃ gaṇanāya thullaccaye āpajjati. Mahāpaccariyaṃ aphuṭṭhāsu dukkaṭaṃ vuttaṃ. Tattha yasmā pāliyaṃ kāyapaṭibaddhaṃ kāyapaṭibaddhena āmasanannāma natthi tasmā sabbampi kāyapaṭibaddhaṃ kāyapaṭibaddheneva saṅgaṇhitvā mahāaṭṭhakathāyañca kurundiyañca vutto purimanayo cettha yuttataro dissati. Yo hi hatthena hatthaṃ gahetvā paṭipāṭiyā ṭhitāsu itthīsu samasārāgo ekaṃ hatthe gaṇhāti so gahititthiyā vasena ekaṃ saṅghādisesaṃ āpajjati itarāsaṃ gaṇanāya purimanayeneva thullaccaye. Sace so taṃ kāyapaṭibaddhe vatthe vā pupphe vā gaṇhāti sabbāsaṃ gaṇanāya thullaccaye āpajjati. Yatheva hi rajjuvatthādīhi parikkhipantena sabbāpi kāyapaṭibaddhena āmaṭṭhā honti tathā idhāpi sabbā kāyapaṭibaddhena āmaṭṭhā hontīti. Sace pana tā itthiyo aññamaññaṃ vatthakoṭiyaṃ gahetvā ṭhitā honti tatra ceso purimanayeneva paṭhamaṃ itthiṃ hatthe gaṇhāti gahitāya vasena saṅghādisesaṃ āpajjati itarāsaṃ gaṇanāya dukkaṭāni. Sabbāsaṃ hi tāsaṃ tena purimanayeneva kāyapaṭibaddhena kāyapaṭibaddhaṃ āmaṭṭhaṃ hoti. Sace pana sopi taṃ kāyapaṭibaddheyeva gaṇhāti tassā vasena thullaccayaṃ āpajjati itarāsaṃ gaṇanāya anantaranayeneva dukkaṭāni. Yo pana ghanavatthanivatthaṃ Itthiṃ kāyasaṃsaggarāgena vatthe saṅghaṭṭeti thullaccayaṃ. Viralavatthanivatthaṃ saṅghaṭaṭeti tatra ce vatthantarehi itthiyā vā nikkhantalomāni bhikkhuṃ bhikkhuno vā paṭiṭṭhalomāni itthiṃ phusanti ubhinnaṃ lomāniyeva vā lomāni phusanti saṅghādiseso. Upādinnakena hi kammajarūpena upādinnakaṃ vā anupādinnakaṃ vā anupādinnakenapi kesādinā upādinnakaṃ vā anupādinnakaṃ vā phusantopi saṅghādisesaṃ āpajjatiyeva. Tattha kurundiyaṃ lomāni gaṇetvā saṅghādisesoti vuttaṃ. Mahāaṭṭhakathāyaṃ pana lomāni gaṇetvā āpattiyā na kāretabbo ekameva saṅghādisesaṃ āpajjati saṅghike mañce pana apaccattharitvā nipanno lomāni gaṇetvā kāretabboti vuttaṃ. Tadeva yuttaṃ. Itthīvasena hi ayaṃ āpatti na koṭṭhāsavasenāti. Etthāha yo pana kāyapaṭibaddhaṃ gaṇhissāmīti kāyaṃ gaṇhāti kāyaṃ vā gaṇhissāmīti kāyapaṭibaddhaṃ gaṇhāti so kiṃ āpajjatīti. Mahāsumatthero tāva yathāvatthukamevāti vadati. Ayaṃ kirassa laddhi