{279} Evaṃ vatthuvasena vitthārato āpattibhedaṃ dassetvā idāni lakkhaṇavasena saṅkhepato āpattibhedañca anāpattiñca dassento sevanādhippāyoti ādimāha. Tattha purimanaye itthiyā phuṭaṭho samāno sevanādhippāyo kāyena vāyamati phassaṃ paṭivijānāti tivaṅgasampattiyā saṅghādiseso. Dutiye nissaggiyena nissaggiyāmasane viya vāyamitvā acchupane viya ca phassassa apaṭivijānanato duvaṅgasampattiyā dukkaṭaṃ. Tatiye kāyena avāyamato anāpatti. Yo hi sevanādhippāyo niccalena kāyena kevalaṃ phassaṃ paṭivijānāti sādiyati anubhoti tassa cittuppādamatte āpattiyā abhāvato Anāpatti. Catutthe pana nissaggiyena nissaggiyāmasane viya phassaṃ paṭivijānanāpi natthi kevalaṃ cittuppādamattameva tasmā anāpatti. Mokkhādhippāyassa sabbākāresu anāpatti. Ettha pana yo itthiyā gahito taṃ attano sarīrā mocetukāmo paṭippaṇāmeti vā paharati vā ayaṃ kāyena vāyamati phassaṃ paṭivijānāti. Yo āgacchantiṃ disvā tato muccitukāmo uttāsetvā palāpeti ayaṃ kāyena vāyamati na ca phassaṃ paṭivijānāti. Yo tādisaṃ dīghajātikaṃ kāye āruḷhaṃ disvā saṇikaṃ gacchatu ghaṭṭiyamānā anatthāya saṃvatteyyāti na ghaṭṭeti itthimeva vā aṅgaṃ phusamānaṃ ñatvā esā anatthiko ayaṃ mayāti sayameva pakkamissatīti ajānanto viya niccalo hoti balavitthiyā vā gāḷhaṃ āliṅgitvā gahito daharabhikkhu palāyitukāmopi suṭṭhu gahitattā niccalo hoti ayaṃ ca na kāyena vāyamati phassaṃ paṭivijānāti. Yo pana āgacchantiṃ disvā āgacchatu tāva tato taṃ paharitvā vā paṇāmetvā vā pakkamissāmīti niccalo hoti ayaṃ mokkhādhippāyo na ca kāyena vāyamati na ca phassaṃ paṭivijānātīti veditabbo. {280} Asañcicacāti iminā upāyena imaṃ phussissāmīti acetetvā. Evaṃ hi acetetvā pattapaṭiggahaṇādīsu mātugāmassa aṅge phuṭṭhepi anāpatti. Asatiyāti aññāvihito hoti mātugāmaṃ phusāmīti sati natthi evaṃ asatiyā hatthapādappasāraṇādikāle phusantassa anāpatti. Ajānantassāti dārakavesena ṭhitaṃ dārikaṃ disvā itthīti ajānanto Kenacideva karaṇīyena phusati evaṃ itthīti ajānantassa phusato anāpatti. Asādiyantassāti kāyasaṃsaggaṃ asādiyantassa bāhāparamparāya nītabhikkhussa viya anāpatti. Ummattakādayo vuttanayāeva. Idha pana udāyitthero ādikammiko tassa anāpatti ādikammikassāti.