Padabhājanīyavaṇṇanā niṭṭhitā.

Samuṭṭhānādīsu idaṃ sikkhāpadaṃ paṭhamapārājikasamuṭṭhānaṃ kāyacittato samuṭṭhāti kiriyā saññāvimokkhaṃ sacittakaṃ lokavajjaṃ kāyakammaṃ akusalacittaṃ dvivedanaṃ sukhamajjhattadvayenāti.

{281} Vinītavatthūsu. Mātuyā mātuppemenāti mātuppemena mātuyā kāyaṃ āmasati. Esa nayo dhītubhaginīvatthūsu. Tattha yasmā mātā vā hotu dhītā vā itthī nāma sabbāpi brahmacariyassa pāripanthikāva tasmā ayaṃ me mātā ayaṃ dhītā ayaṃ bhaginīti gehasitappemena āmasato dukkaṭameva vuttaṃ.

Imaṃ pana bhagavato āṇamanussarantena sacepi nadīsotena vuyhamānaṃ mātaraṃ passati neva hatthena parāmasitabbā. Paṇḍitena pana bhikkhunā nāvā vā phalakaṃ vā kadalikkhandho vā dārukhaṇḍaṃ vā upasaṃharitabbaṃ tasmiṃ asati kāsāvampi upasaṃharitvā purato ṭhapetabbaṃ ettha gaṇhāhīti pana na vattabbā. Gahite parikkhāraṃ kaḍḍhāmīti kaḍḍhantena gantabbaṃ. Sace pana bhāyati purato purato gantvā mā bhāyīti samassāsetabbā. Sace vuyhamānā puttassa sahasā Khandhe vā abhiruhati hatthe vā gaṇhāti na apehi mahalliketi niddhūnitabbā thalaṃ pāpetabbā. Kaddame laggāyapi kūpe patitāyapi eseva nayo. Tatrāpi hi yottaṃ vā vatthaṃ vā pakkhipitvā hatthena gahitabhāvaṃ ñatvā uddharitabbā na tveva āmasitabbā.