Na kevalañca mātugāmassa sarīrameva anāmāsaṃ nivāsanapārupanampi ābharaṇabhaṇḍampi tiṇaṇḍūpakaṃ vā tālapaṇṇamuddikaṃ vā upādāya anāmāsameva. Tañca kho nivāsanapārupanaṃ pilandhanatthāya ṭhapitameva. Sace pana nivāsanaṃ vā pārupanaṃ vā parivattetvā cīvaratthāya pādamūle ṭhapeti vaṭṭati. Ābharaṇabhaṇḍesu pana sīsappasādhanaka- dantasūciādikappiyabhaṇḍaṃ imaṃ bhante tumhe gaṇhāthāti dīyamānaṃ sipāṭikāsūciādiupakaraṇatthāya gahetabbaṃ. Suvaṇṇarajatamuttādimayaṃ pana anāmāsameva dīyamānampi na gahetabbaṃ.
Na kevalañca etāsaṃ sarīrūpagameva anāmāsaṃ itthīsaṇṭhānena kataṃ kaṭṭharūpampi dantarūpampi ayarūpampi loharūpampi tipurūpampi potthakarūpampi sabbaratanarūpampi antamaso piṭṭhamayaṃ rūpampi anāmāsameva. Paribhogatthāya pana idaṃ tumhākaṃ hotūti labhitvā ṭhapetvā sabbaratanamayaṃ avasesaṃ bhinditvā upakaraṇārahaṃ upakaraṇe paribhogārahaṃ ca paribhoge upanetuṃ vaṭṭati.
Yathā ca itthīrūpakaṃ evaṃ sattavidhaṃ dhaññampi anāmāsaṃ. Tasmā khettamajjhena gacchatā tattha jātakampi dhaññaphalaṃ anāmasantena gantabbaṃ . Sace gharadvāre vā magge vā dhaññaṃ pasāritaṃ hoti Passena ca maggo atthi na maddantena gantabbaṃ. Gamanamagge asati maggaṃ adhiṭṭhāya gantabbaṃ. Antaraghare dhaññassa upari āsanaṃ paññāpetvā denti nisīdituṃ vaṭṭati. Keci āsanasālāya dhaññaṃ ākīranti. Sace sakkā hoti harāpetuṃ harāpetabbaṃ. No ce ekamantaṃ dhaññaṃ amaddantena pīṭhakaṃ paññāpetvā nisīditabbaṃ. Sace okāso na hoti manussā dhaññamajjheyeva paññāpetvā denti nisīditabbaṃ. Nāvaṭṭhesupi eseva nayo. Tattha jātakāni muggamāsādīni aparannānipi tālapanasādīni vā phalāni kīḷantena na āmasitabbāni. Manussehi rāsikatesupi eseva nayo. Araññe pana rukkhato patitāni phalāni anupasampannānaṃ dassāmīti gaṇhituṃ vaṭṭati.
Muttā maṇi veḷuriyo saṅkho silā pabāḷaṃ rajataṃ jātarūpaṃ lohitako masāragallanti imesu dasasu ratanesu muttā adhotaviddhā yathājātā va āmasituṃ vaṭṭati. Sesā anāmāsāti vadanti mahāpaccariyaṃ pana muttā dhotāpi adhotāpi anāmāsā bhaṇḍamūlatthāya ca sampaṭicchituṃ na vaṭṭati kuṭṭharogassa bhesajjāya pana vaṭṭatīti vuttaṃ. Antamaso jātiphaḷikaṃ upādāya sabbopi nīlapītādivaṇṇabhedo maṇi dhotaviddhavaṭṭito anāmāso. Yathājāto pana ākaramutto pattādibhaṇḍamūlatthaṃ sampaṭicchituṃ vaṭṭatīti vutto. Sopi mahāpaccariyaṃ paṭikkhitto. Pacitvā kato kācamaṇiyeveko vaṭṭatīti vutto. Veḷuriyepi maṇisadiso va vinicchayo. Saṅkho dhamanasaṅkho ca dhotaviddho ca ratanamisso ca