{286} Idāni yvāyaṃ otiṇṇo vipariṇatena cittena obhāsati tassa vaccamaggapassāvamagge ādissa etesaṃ vaṇṇabhaṇanādīnaṃ vasena vitthārato āpattibhedaṃ dassento itthī ca hoti itthīsaññīti ādimāha. Tesaṃ attho kāyasaṃsagge vuttanayeneva veditabbo. Ayaṃ pana viseso. Adhakkhakanti akkhakato paṭṭhāya adho. Ubbhajānumaṇḍalanti jānumaṇḍalato paṭṭhāya uddhaṃ. Ubbhakkhakanti akkhakato paṭṭhāya uddhaṃ. Adhojānumaṇḍalanti jānumaṇḍalato paṭṭhāya adho. Akkhakaṃ pana jānumaṇḍalañca ettheva dukkaṭakkhette saṅgahaṃ gacchati bhikkhuniyā kāyasaṃsagge viya. Na hi buddhā garukāpattiṃ sāvasesaṃ paññāpentīti. Kāyapaṭibaddhanti vatthaṃ vā pupphaṃ vā ābharaṇaṃ vā.

{287} Atthapurekkhārassāti animittāsīti ādīnaṃ padānaṃ atthaṃ kathentassa aṭṭhakathaṃ vā sajjhāyaṃ karontassa. Dhammapurekkhārassāti Pāliṃ vācentassa vā sajjhāyantassa vā. Evaṃ atthañca dhammañca purakkhitvā bhaṇantassa atthapurekkhārassa ca dhammapurekkhārassa ca anāpatti. Anusāsanīpurekkhārassāti idānipi animittāsi ubhatobyañjanakāsi appamādaṃ dāni kareyyāsi yathā āyatimpi evarūpā māhosīti evaṃ anusiṭaṭhiṃ purakkhitvā bhaṇantassa anusāsanīpurekkhārassa anāpatti. Yo pana bhikkhunīnaṃ pāliṃ vācento pakativācanāmaggaṃ pahāya hasanto hasanto sikhiraṇīsi sambhinnāsi ubhatobyañjanakāsīti punappunaṃ bhaṇati tassa āpattiyeva. Ummattakassa anāpatti. Idha ādikammiko udāyitthero tassa anāpatti ādikammikassāti.

Padabhājanīyavaṇṇanā niṭṭhitā

samuṭṭhānādīsu idaṃ sikkhāpadaṃ tisamuṭṭhānaṃ kāyacittato vācācittato kāyavācācittato ca samuṭṭhāti kiriyā saññāvimokkhaṃ sacittakaṃ lokavajjaṃ kāyakammaṃ vacīkammaṃ akusalacittaṃ dvivedananti.