Thero kārako hotīti vadanti. Pañho na chijjati. Rājā sutvā there sannipātāpetvā dīghakārāyanaṃ nāma brāhmaṇajātiyaṃ amaccaṃ therānaṃ kathaṃ suṇāhīti āṇāpesi. Amacco kira paṇḍito bhāsantarakusalo. So āha vadantu bhante therā suttanti. Tato abhayagirittherā attano suttaṃ vadiṃsu tenahi bhikkhave mettiyaṃ bhikkhuniṃ sakāya paṭiññāya nāsethāti. Amacco bhante tumhākaṃ vāde thero kārako hoti sadosoti āha. Mahāvihāravāsinopi attano suttaṃ vadiṃsu tenahi bhikkhave mettiyaṃ bhikkhuniṃ nāsethāti. Amacco bhante tumhākaṃ vāde thero akārako hoti niddosoti āha. Kimpanettha yuttaṃ yaṃ pacchā vuttaṃ vicāritaṃ hetaṃ aṭṭhakathācariyehi. Bhikkhu bhikkhuṃ amūlakena antimavatthunā anuddhaṃseti saṅghādiseso bhikkhuniṃ anuddhaṃseti dukkaṭaṃ. Kurundiyaṃ pana musāvāde pācittiyanti vuttaṃ. Tatrāyaṃ vicāraṇā. Purimanaye tāva anuddhaṃsanādhippāyattā dukkaṭameva yujjati. Yathā satipi musāvāde bhikkhuno bhikkhusmiṃ saṅghādiseso satipi ca musāvāde asuddhaṃ suddhadiṭṭhino akkosādhippāyena vadantassa omasavādeneva pācittiyaṃ na sampajānamusāvādena evaṃ idhāpi anuddhaṃsanādhippāyattā sampajānamusāvāde pācittiyaṃ na yujjati dukkaṭameva yuttaṃ. Pacchimanayepi musāvādattā pācittiyameva yujjati . Vacanappamāṇato hi anuddhaṃsanādhippāyena bhikkhussa bhikkhusmiṃ saṅghādiseso akkosādhippāyassa musāvāde bhikkhussa bhikkhusmiṃ saṅghādiseso akkosādhippāyassa ca omasavāde bhikkhussa Pana bhikkhuniyā dukkaṭanti vacanaṃ natthi sampajānamusāvāde pācittiyanti vacanamatthi tasmā pācittiyameva yujjati. Tatra pana idaṃ upaparikkhitabbaṃ. Anuddhaṃsanādhippāye asati pācittiyaṃ tasmiṃ sati kena bhavitabbanti. Tatra yasmā musā bhaṇantassa pācittiye siddhepi amūlakena saṅghādisesena anuddhaṃsane visuṃ pācittiyaṃ vuttaṃ tasmā anuddhaṃsanādhippāye sati sampajānamusāvāde pācittiyassa okāso na dissati na ca sakkā anuddhaṃsentassa anāpattiyā bhavitunti purimanayovettha parisuddhataro khāyati. Tathā bhikkhunī bhikkhuniṃ amūlakena antimavatthunā anuddhaṃseti saṅghādiseso bhikkhuṃ anuddhaṃseti dukkaṭaṃ. Tatra saṅghādiseso vuṭṭhānagāmī dukkaṭaṃ desanāgāmī etehi nāsanā natthi. Yaṃpi sā bhagavato pūrato ṭhatvā musā abhaṇi tenassā sampajānamusāvāde pācittiyaṃ imināpi nāsanā natthi. Yasmā pana sā pakatiyāva dussīlā pāpabhikkhunī idāni ca sayameva dussīlamhīti vadati tasmā naṃ bhagavā asuddhattāyeva nāsāpesi. Athakho mettiyabhummajakāti evaṃ mettiyaṃ bhikkhuniṃ nāsetha ime ca bhikkhū anuyuñjathāti vatvā uṭṭhāyāsanā vihāraṃ paviṭṭhe bhagavati tehi bhikkhūhi detha dāni imissā setakānīti nāsiyamānaṃ taṃ bhikkhuniṃ disvā te bhikkhū taṃ mocetukāmatāya attano aparādhaṃ āvikariṃsu. Etamatthaṃ dasasetuṃ athakho mettiyabhummajakāti ādi vuttaṃ.