Tattha ca dhammoti bhūtavatthu. Vinayoti codanā sāraṇā ca. Satthusāsananti ñattisampadā ca anussāvanasampadā ca. Tasmā codakena vatthusmiṃ āropite cuditako pucchitabbo santametaṃ noti. Evaṃ vatthuṃ upaparikkhitvā bhūtena vatthunā codetvā sāretvā ñattisampadāya ca anussāvanasampadāya ca taṃ adhikaraṇaṃ vūpasametabbaṃ. Tatra ce alajjī lajjiṃ codeti so ca alajjī bālo hoti abyatto nāssa anuyogo dātabbo. Evaṃ pana vattabbo kimhi naṃ codesīti. Addhā so vakkhati kimidaṃ bhante kimhinannāmāti . Tvaṃ kimhinampi na jānāsi na yuttaṃ tayā evarūpena bālena paraṃ codetunti uyyojetabbo. Nāssa anuyogo dātabbo. Sace pana so alajjī paṇḍito hoti byatto diṭṭhena vā sutena vā ajjhottharitvā sampādetuṃ sakkoti etassa anuyogaṃ datvā lajjisseva paṭiññāya kammaṃ kātabbaṃ. Sace lajjī alajjiṃ codeti so ca lajjī bālo hoti abyatto na sakkoti anuyogaṃ dātuṃ tassa nayo dātabbo kimhi naṃ codesi sīlavipattiyā vā ācāravipattiādīsu vā ekissāti. Kasmā pana imasseva evaṃ nayo dātabbo na itarassāti. Nanu na yuttaṃ vinayadharānaṃ agatigamananti. Na yuttameva. Idaṃ pana agatigamanaṃ na hoti. Dhammānuggaho nāma eso. Alajjiniggahatthāya hi lajjipaggahatthāya ca sikkhāpadaṃ paññattaṃ. Tatra alajjī nayaṃ labhitvā ajjhottharanto ehīti. Lajjī pana nayaṃ labhitvā diṭṭhe diṭṭhasantānena sute sutasantānena Patiṭṭhāya kathessati. Tasmā tassa dhammānuggaho vaṭṭati. Sace pana so lajjī paṇḍito hoti byatto patiṭṭhāya katheti alajjī ca etampi natthi etampi natthīti paṭiññaṃ na deti alajjissa paṭiññāyaeva kātabbaṃ. Tadatthadīpanatthañca idaṃ vatthu veditabbaṃ. Tepiṭakacūḷābhayatthero kira lohapāsādassa heṭṭhā bhikkhūnaṃ vinayaṃ kathetvā sāyaṇhasamaye vuṭṭhāti. Tassa vuṭṭhānasamaye dve atthapaccatthikā kathaṃ pavattesuṃ. Eko etampi natthi etampi natthīti paṭiññaṃ na deti. Atha appāvasese paṭhamayāme therassa tasmiṃ puggale ayaṃ patiṭṭhāya katheti ayaṃ pana paṭiññaṃ na deti bahūni ca vatthūni osaṭāni addhā etaṃ kataṃ bhavissatīti asuddhaladdhi uppannā. Tato vijanīdaṇḍakena pādakaṭṭhalikāya saññaṃ datvā ahaṃ āvuso vinicchinituṃ ananucchaviko aññena vinicchināpehīti āha. Kasmā bhanteti. Thero tamatthaṃ ārocesi. Cuditapuggalassa kāye dāho uṭṭhito. Tato theraṃ vanditvā vinicchinituṃ anurūpena vinayadharena nāma tumhādiseneva bhavituṃ vaṭṭati codakena ca īdiseneva bhavituṃ vaṭṭatīti vatvā setakāni nivāsetvā ciraṃ kilamitattha mayāti khamāpetvā pakkāmi. Evaṃ lajjinā codiyamāno alajjī bahūsupi vatthūsu uppannesu paṭiññaṃ na deti. So neva suddhoti vattabbo na asuddhoti. Jīvamatako nāma āmakapūtiko nāmeso. Sace panassa aññampi tādisaṃ vatthu uppajjati na vinicchinitabbaṃ. Tathānāsitakova bhavissati. Sace pana alajjīyeva alajjiṃ codeti so vattabbo Āvuso tava vacanenāyaṃ kiṃ sakkā vattunti. Itarampi tatheva vatvā ubho ekasambhogaparibhogā hutvā jīvathāti uyyojetabbā. Sīlatthāya tesaṃ vinicchayo na kātabbo. Pattacīvarapariveṇādiatthāya pana paṭirūpaṃ sakkhiṃ labhitvā kātabbo. Atha lajjīyeva lajjiṃ codeti vivādo ca nesaṃ kismiñcideva appamattako hoti saññāpetvā mā evaṃ karothāti accayaṃ desāpetvā uyyojetabbā. Atha panettha cuditakena sahasā viraddhaṃ hoti ādito paṭṭhāya alajjī nāma natthi. So ca pakkhānurakkhaṇatthāya paṭiññaṃ na deti. Mayaṃ saddahāma mayaṃ saddahāmāti bahū uṭṭhahanti. So tesaṃ paṭiññāya ekavāraṃ dvevāraṃ suddho hotu. Atha pana viraddhakālato paṭṭhāya ṭhāne na tiṭṭhati. Vinicchayo dātabbo.