Tāya kīḷanti velambakā viya. Hatthismimpi sikkhantīti hatthinimittaṃ yaṃ sippaṃ sikkhitabbaṃ taṃ sikkhanti. Esa nayo assādīsu. Dhāvantipīti parammukhā gacchantā dhāvanti. Ādhāvantipīti yattakaṃ dhāvanti tattakameva abhimukhā puna āgacchantā ādhāvanti. Nibbujjhantīti mallayuddhaṃ karonti. Nalāṭikampi dentīti sādhu sādhu bhaginīti attano nalāṭe aṅguliṃ ṭhapetvā tassā nalāṭe ṭhapenti. Vividhampi anācāranti aññaṃpi pāliyaṃ anāgataṃ mukhadeṇḍimādivividhaṃ anācāraṃ ācaranti.
Pāsādikenāti pasādāvahena sāruppena samaṇānucchavikena. Abhikkantenāti gamanena. Paṭikkantenāti nivattanena. Ālokitenāti purato dassanena. Vilokitenāti itocītoca dassanena. Sammiñjitenāti pabbasaṅkocanena. Pasāritenāti tesaṃyeva pasāraṇena. Sabbattha itthambhūtākhyānatthe karaṇavacanaṃ. Satisampajaññehi abhisaṅkhatattā pāsādika abhikkanta paṭikkanta ālokita vilokitasammiñjita pasārito hutvāti vuttaṃ hoti. Okkhittacakkhūti heṭṭhā khittacakkhu. Iriyāpathasampannoti tāya pāsādikaabhikkantāditāya sampannairiyāpatho. Kvāyanti ko ayaṃ. Abaḷabaḷo viyāti abaḷo kira bondo vuccati. Atisayatthe ca idaṃ āmeḍitaṃ. Tasmā atibondo viyāti vuttaṃ hoti. Mandamandoti abhikkantādīnaṃ anuddhaṭatāya atimando atisaṇhoti evaṃ guṇameva dosato dassenti. Bhākuṭikabhākuṭiko viyāti okkhittacakkhutāya bhakuṭiṃ Katvā saṅkucitamukho kupito viya vicaratīti maññamānā vadanti. Saṇhāti nipuṇā. Amma tāta bhaginīti evaṃ upāsakajanaṃ yuttaṭṭhāne upanetuṃ chekā. Na yathā ayaṃ evaṃ abaḷabaḷā viyāti adhippāyo. Sakhilāti sākhallena yuttā. Sukhasaṃbhāsāti idaṃ purimassa kāraṇavacanaṃ. Yesaṃ hi sukhasaṃbhāsā sammodanīyakathā nelā hoti kaṇṇasukhā te sakhilāti vuccanti. Tenāhaṃsu sakhilā sukhasaṃbhāsāti. Ayaṃ panettha adhippāyo amhākaṃ ayyā upāsake disvā madhuraṃ sammodanīyakathaṃ kathenti tasmā sakhilā sukhasaṃbhāsā na yathā ayaṃ evaṃ mandamandā viyāti. Mihitapubbaṅgamāti mihitaṃ pubbaṅgamaṃ etesaṃ vacanassāti mihitapubbaṅgamā. Paṭhamaṃ sitaṃ katvā pacchā vadantīti attho. Ehisvāgatavādinoti upāsakaṃ disvā ehi svāgatantavāti evaṃvādino na yathā ayaṃ evaṃ saṅkucitamukhatāya bhākuṭikā viya. Evaṃ mihitapubbaṅgamāditāya abhākuṭikabhāvaṃ atthato dassetvā puna sarūpenapi dassentā āhaṃsu abhākuṭikā uttānamukhā pubbabhāsinoti. Uppaṭipāṭiyā vā tiṇṇampi ākārānaṃ abhāvadassanametanti veditabbaṃ. Kathaṃ. Ettha hi abhākuṭikāti iminā bhākuṭikabhākuṭikākārassa abhāvo dassito. Uttānamukhāti iminā mandamandākārassa. Ye hi cakkhūhi ummiletvā ālokanena uttānamukhā honti na te mandamandā. Pubbabhāsinoti iminā abaḷabaḷākārassa abhāvo dassito. Ye hi ābhāsanakusalatāya amma tātāti paṭhamataraṃ Ābhāsanti na te abaḷabaḷāti.