Ehi bhante gharaṃ gamissāmāti so kira upāsako na kho āvuso piṇḍo labbhatīti vutte tumhākaṃ bhikkhūhiyeva etaṃ kataṃ sakalagāmampi carantā na lacchathāti vatvā piṇḍapātaṃ dātukāmo ehi bhante gharaṃ gamissāmāti āha. Kiṃ panāyaṃ payuttavācā hoti na hotīti. Na hoti. Pucchitapañhā nāmāyaṃ kathetuṃ vaṭṭati. Tasmā idāni cepi pubbaṇhe vā sāyaṇhe vā antaragharaṃ paviṭṭhaṃ koci puccheyya kasmā bhante carathāti yenatthena carati taṃ ācikkhitvā laddhaṃ na laddhanti vutte sace na laddhaṃ na laddhanti vatvā yaṃ so deti taṃ gahetuṃ vaṭṭati. Duṭṭhoti na pāsādādīnaṃ vināsena duṭṭhapuggalavasena duṭṭho. Dānapathānīti dānāniyeva vuccanti. Athavā dānapathānīti dānanibaddhāni dānavattānīti vuttaṃ hoti. Upacchinnānīti dāyakehi pacchinnāni. Na te tāni etarahi denti. Riñcantīti visuṃ honti nānā honti pakkamantīti vuttaṃ hoti. Saṇṭhaheyyāti sammā tiṭṭheyya pesalānaṃ bhikkhūnaṃ patiṭṭhā bhaveyya. Evamāvusoti kho so bhikkhu saddhassa pasannassa upāsakassa sāsanaṃ sampaṭicchi. Evarūpaṃ kira sāsanaṃ kappiyaṃ harituṃ vaṭṭati. Tasmā mama vacanena bhagavato pāde vandathāti vā cetiyaṃ paṭimaṃ bodhiṃ saṅghattheraṃ vandathāti vā cetiye gandhapūjaṃ pupphapūjaṃ karothāti vā bhikkhū sannipātetha dānaṃ dassāma dhammaṃ sossāmāti vā īdisesu Sāsanesu kukkuccaṃ na kātabbaṃ. Kappiyasāsanāni etāni na gihīnaṃ gihikammapaṭisaṃyuttānīti. Kuto ca tvaṃ bhikkhu āgacchasīti nisinno so bhikkhu na āgacchati. Atthato pana āgato hoti. Evaṃ santepi vattamānasamīpe vattamānavacanaṃ labbhati tasmā na doso. Pariyosāne tato ahaṃ bhagavā āgacchāmīti etasmimpi vacane eseva nayo.
{433} Paṭhamaṃ assajipunabbasukā bhikkhū codetabbāti mayaṃ tumhe vattukāmāti okāsaṃ kārāpetvā vatthunā ca āpattiyā ca codetabbā codetvā yaṃ na saranti taṃ sāretabbā. Sace vatthuñca āpattiñca paṭijānanti āpattimeva vā paṭijānanti na vatthuṃ āpatti ropetabbā. Atha vatthumeva paṭijānanti nāpattiṃ evampi imasmiṃ vatthusmiṃ ayaṃ nāma āpattīti ropetabbā eva. Yadi neva vatthuṃ nāpattiṃ paṭijānanti āpatti na ropetabbāti ayamettha vinicchayo. Yathāpaṭiññāya pana āpattiṃ ropetvā evaṃ pabbājanīyakammaṃ kātabbanti dassento byattena bhikkhunāti ādimāha. Taṃ uttānameva. Evaṃ pabbājanīyakammakatena pana bhikkhunā yasmiṃ vihāre vasantena yasmiṃ gāme kuladūsakakammaṃ kataṃ hoti tasmiṃ vihāre gāme vā na vasitabbaṃ. Tasmiṃ vihāre vasantena sāmantagāme piṇḍāya na caritabbaṃ. Sāmantavihārepi vasantena tasmiṃ gāme piṇḍāya na caritabbaṃ. Upatissatthero pana bhante nagarannāma mahantaṃ dvādasayojanikampi hotīti Antevāsikehi vutto yassā vīthiyā kuladūsakakammaṃ kataṃ tato vāritanti āha. Tato vīthipi mahatī nagarappamāṇāva hotīti vutto yassā gharapaṭipāṭiyāti āha. Gharapaṭipāṭipi vīthippamāṇāva hotīti vutto itocītoca satta gharāni vāritānīti āha. Taṃ pana sabbaṃ therassa manorathamattameva. Sacepi vihāro tiyojanaparamo hoti dvādasayojanaparamañca nagaraṃ neva vihāre vasituṃ labbhati na nagare caritunti.