{435} Te saṅghena pabbājanīyakammakatāti kathaṃ saṅgho tesaṃ kammaṃ akāsi. Na gantvāva ajjhottharitvā akāsi athakho kulehi nimantetvā nimantetvā saṅghabhattesu kariyamānesu tasmiṃ tasmiṃ ṭhāne therā samaṇapaṭipadaṃ kathetvā ayaṃ samaṇo ayaṃ assamaṇoti manusse saññāpetvā ekaṃ dve bhikkhū sīmaṃ pavesetvā eteneva upāyena sabbesampi pabbājanīyakammaṃ akaṃsūti. Evaṃ pabbājanīyakammakatassa ca aṭṭhārasa vattāni pūretvā yācantassa kammaṃ paṭippassambhitabbaṃ. Paṭippassaddhakammenāpi ca tena yesu kulesu pubbe kuladūsakakammaṃ kataṃ tato paccayā na gahetabbā. Āsavakkhayappattenāpi na gahetabbā akappiyāva honti. Kasmā na gaṇhāthāti pucchitena pubbe evaṃ katattāti vutte sace vadanti na mayaṃ tena kāraṇena dema idāni sīlavantatāya demāti gahetabbā. Pakatiyā dānaṭṭhāneyeva kuladūsakakammaṃ kataṃ hoti tato pakatidānameva gahetuṃ vaṭṭati. Yaṃ vaḍḍhetvā denti taṃ na vaṭṭati. Na sammā vattantīti te pana assajipunabbasukā aṭṭhārasasu vattesu Sammā na vattanti. Na lomaṃ pātentīti anulomapaṭipadaṃ apaṭipajjanatāya na pannalomā honti. Na netthāraṃ vattantīti attano nittharaṇamaggaṃ na paṭipajjanti. Bhikkhū na khamāpentīti dukkaṭaṃ bhante amhehi na puna evaṃ karissāma khamatha amhākanti evaṃ bhikkhūnaṃ khamāpanaṃ na karonti. Akkosantīti kārakasaṅghaṃ dasahi akkosavatthūhi akkosanti. Paribhāsantīti bhayaṃ tesaṃ dassenti. Chandagāmitā .pe. Bhayagāmitā pāpentīti ete chandagāmino ca .pe. Bhayagāmino cāti evaṃ chandagāmitāyapi .pe. Bhayagāmitāyapi pāpenti yojentīti attho. Pakkamantīti tesaṃ parivāresu pañcasu samaṇasatesu ekacce disā pakkamanti. Vibbhamantīti ekacce gihī honti. Kathaṃ hi nāma assajipunabbasukāti ettha dvinnaṃ pāmokkhānaṃ vasena sabbepi assajipunabbasukāti vuttā.

{436-437} Gāmaṃ vāti ettha nagarampi gāmaggahaṇeneva gahitaṃ. Tenassa padabhājane gāmopi nigamopi nagarampi gāmo ceva nigamo cāti vuttaṃ. Tattha apākāraparikkhepo saāpaṇo nigamoti veditabbo. Kulāni dūsetīti kuladūsako. Dūsento ca na asucikaddamādīhi dūseti atha kho attano duppaṭipattiyā tesaṃ pasādaṃ vināseti. Tenevassa padabhājane pupphena vāti ādi vuttaṃ.