Tattha yo haritvā vā harāpetvā vā pakkositvā vā pakkosāpetvā vā sayaṃ vā upagatānaṃ yaṅkiñci attano santakaṃ pupphaṃ kulasaṅgahatthāya deti dukkaṭaṃ. Parasantakaṃ deti dukkaṭameva. Theyyacittena deti bhaṇḍagghena kāretabbo. Eseva nayo saṅghikepi. Ayampana viseso. Senāsanatthāya niyāmitaṃ issaravatāya dadato thullaccayaṃ. Pupphannāma kassa dātuṃ vaṭṭati kassa na vaṭṭatīti. Mātāpitūnaṃ tāva haritvāpi harāpetvāpi pakkositvāpi pakkosāpetvāpi dātuṃ vaṭṭati. Sesañātakānaṃ pakkosāpetvāva. Tañca kho vatthupūjanatthāya. Maṇḍanatthāya pana sivaliṅgādipūjanatthāya vā kassacipi dātuṃ na vaṭṭati. Mātāpitūnañca harāpentena ñātisāmaṇereheva harāpetabbaṃ. Itare pana yadi sayameva icchanti vaṭṭati. Sammatena pupphabhājakena bhājanakāle sampattānaṃ sāmaṇerānaṃ upaḍḍhabhāgaṃ dātuṃ vaṭṭati. Kurundiyaṃ sampattagihīnaṃ upaḍḍhabhāgaṃ mahāpaccariyaṃ cūḷakaṃ dātuṃ vaṭṭatīti vuttaṃ. Asammatena apaloketvā dātabbaṃ ācariyūpajjhāyesu sagāravā sāmaṇerā bahūni pupphāni āharitvā rāsiṃ katvā ṭhapenti. Therā pātova sampattānaṃ saddhivihārikādīnaṃ upāsakānaṃ vā tvaṃ idaṃ gaṇha tvaṃ idaṃ gaṇahāti denti. Pupphadānaṃ nāma na hoti. Cetiyaṃ pūjessāmāti gahetvā gacchantāpi pūjaṃ karontāpi tattha tattha sampattānaṃ cetiyapūjanatthāya denti. Etampi pupphadānannāma na hoti. Upāsake akkapupphādīhi pūjante disvā vihāre kaṇṇikārapupphādīni atthi upāsakā tāni gahetvā pūjethāti vattuṃpi vaṭṭati. Bhikkhū pupphapūjaṃ katvā divātaraṃ gāmaṃ paviṭṭhe kiṃ bhante atidivā paviṭṭhatthāti pucchanti. Vihāre pupphāni bahūni pūjaṃ akarimhāti vadanti. Manussā bahūni kira vihāre pupphānīti punadivase pahutaṃ khādanīyaṃ bhojanīyaṃ gahetvā vihāraṃ gantvā pupphapūjañca karonti dānañca denti vaṭṭati. Manussā mayambhante asukadivasannāma pūjessāmāti pupphavāraṃ yācitvā anuññātadivase āgacchanti. Sāmaṇerehi ca pageva pupphāni ocinitvā ṭhapitāni honti. Te rukkhesu pupphāni apassantā kuhiṃ bhante pupphānīti vadanti. Sāmaṇerehi ocinitvā ṭhapitāni tumahe pana pūjetvā gacchatha saṅgho aññaṃ divasaṃ pūjessatīti. Te pūjetvā dānaṃ datvā gacchanti vaṭṭati. Mahāpaccariyaṃ pana kurundiyañca therā sāmaṇerehi dāpetuṃ na labhanti sace sayameva tāni pupphāni tesaṃ denti vaṭṭati therehi pana sāmaṇerehi ocinitvā ṭhapitānīti ettakameva vattabbanti vuttaṃ. Sace pana pupphavāraṃ yācitvā anocitesu pupphesu yāgubhattādīni ādāya āgantvā sāmaṇerehi ocinitvā dethāti vadanti ñātakasāmaṇerānaṃyeva ocinitvā dātuṃ vaṭṭati. Aññātake ukkhipitvā rukkhasākhāya ṭhapenti. Na orohitvā palāyitabbaṃ ocinitvā dātuṃ vaṭṭati. Sace pana koci dhammakathiko bahūni upāsakā vihāre pupphāni yāgubhattādīni ādāya gantvā pupphapūjaṃ karothāti vadati tasseva na kappatīti mahāpaccariyañca kurundiyañca vuttaṃ. Mahāaṭṭhakathāyaṃ pana etaṃ akappiyaṃ na vaṭṭatīti avisesena vuttaṃ. Phalaṃpi attano santakaṃ vuttanayeneva mātāpitūnañca sesañātīnañca dātuṃ vaṭṭati. Kulasaṅgahatthāya pana dentassa vuttanayeneva attano Santake parasantake saṅghike senāsanatthāya niyāmite ca dukkaṭādīni veditabbāni. Attano santakaṃyeva gilānamanussānaṃ vā sampattaissarānaṃ vā khīṇaparibbayānaṃ dātuṃ vaṭṭati. Phaladānaṃ na hoti. Phalabhājakenāpi sammatena saṅghassa phalabhājanakāle sampattamanussānaṃ upaḍḍhabhāgaṃ dātuṃ vaṭṭati. Asammatena apaloketvā dātabbaṃ. Saṅghārāmepi phalaparicchedena vā rukkhaparicchedena vā katikā kātabbā tato gilānamanussānaṃ vā aññesaṃ vā phalaṃ yācantānaṃ yathāparicchedena cattāri pañca phalāni dātabbāni rukkhā vā dassetabbā ito gahetuṃ labbhatīti. Idha phalāni sundarāni ito gaṇhāthāti evaṃ pana na vattabbaṃ. Cuṇṇenāti ettha attano santakaṃ sirisacuṇṇaṃ vā aññaṃ vā kasāvaṃ kulasaṅgahatthāya deti dukkaṭaṃ . Parasantakādīsupi vuttanayena vinicchayo veditabbo. Ayaṃ pana viseso. Idha saṅghassa rakkhitagopitāpi rukkhacchalli garubhaṇḍameva. Mattikādantakaṭṭhaveḷūsupi garubhaṇḍūpagaṃ ñatvā cuṇṇe vuttanayeneva vinicchayo veditabbo. Paṇṇadānaṃ pana ettha na āgataṃ. Taṃpi vuttanayeneva veditabbaṃ. Paratopi garubhaṇḍavinicchaye sabbaṃ vitthārena vaṇṇayissāma. Vejjakāya vāti ettha vejjakammavidhi tatiyapārājikavaṇṇanāya vuttanayeneva veditabbo. Jaṅghapesanikenāti ettha jaṅghapesanīyanti gihīnaṃ dūteyyasāsanaharaṇakammaṃ vuccati taṃ na kātabbaṃ. Gihīnaṃ hi sāsanaṃ gahetvā gacchantassa pade pade dukkaṭaṃ. Taṃ kammaṃ nissāya laddhabhojanaṃ bhuñjantassāpi ajjhohāre Ajjhohāre dukkaṭaṃ. Paṭhamaṃ sāsanaṃ aggahetvā pacchā ayaṃ dāni so gāmo handa naṃ sāsanaṃ ārocemīti maggā okkamantassāpi pade pade dukkaṭaṃ. Sāsanaṃ ārocetvā laddhabhojanaṃ bhuñjato purimanayeneva dukkaṭaṃ. Sāsanaṃ aggahetvā āgatena pana bhante tasmiṃ gāme itthannāmassa nāma kā pavuttīti pucchiyamānena kathetuṃ vaṭṭati. Pucchitapañhe doso natthi. Pañcannaṃ pana sahadhammikānaṃ mātāpitūnaṃ paṇḍupalāsassa attano veyyāvaccakarassa ca sāsanaṃ harituṃ vaṭṭati. Gihīnañca pubbe vuttappakāraṃ kappiyasāsanaṃ. Idaṃ hi jaṅghapesanīyakammannāma na hoti. Imehi pana aṭṭhahi kuladūsakakammehi uppannapaccayā pañcannampi sahadhammikānaṃ na kappanti abhūtārocanarūpiyasaṃvohārehi uppannapaccayasadisāva honti.