Ayaṃ pana sabbattha vinicchayo veditabbo. Rahonisajjassādoti methunadhammasannissitakileso vuccati. Yo bhikkhu tenassādena mātugāmassa santikaṃ gantukāmo akkhiṃ añjeti dukkaṭaṃ. Nivāsanaṃ nivāseti kāyabandhanaṃ bandhati cīvaraṃ pārupati sabbattha payoge payoge dukkaṭaṃ. Gacchato padavāre padavāre dukkaṭaṃ. Gantvā nisīdati dukkaṭameva. Mātugāme āgantvā nisinnamatte pācittiyaṃ. Sace sā itthī kenacideva karaṇīyena uṭṭhāya punappunaṃ nisīdati nisajjāya nisajjāya pācittiyaṃ. Yaṃ sandhāya gato sā na diṭṭhā aññā āgantvā nisīdati assāde uppanne pācittiyaṃ. Mahāpaccariyaṃ pana gamanakālato paṭṭhāya asuddhacittattā āpattiyevāti vuttaṃ. Sace sambahulā āgacchanti mātugāmagaṇanāya pācittiyāni. Sace uṭṭhāya uṭṭhāya punappunaṃ nisīdanti nisajjāgaṇanāya pācittiyāni. Aniyametvā diṭṭhadiṭṭhāya saddhiṃ rahassādaṃ kappessāmīti gantvā nisinnassāpi āgatāgatānaṃ vasena punappunaṃ nisajjāvasena ca vuttanayeneva āpattiyo veditabbā. Sacepi suddhacittena gantvā nisinnassa santikaṃ āgantvā nisinnāya itthiyā rahassādo uppajjati anāpattiyeva. Samuṭṭhānādīni paṭhamapārājikasadisānevāti.

Paṭhamāniyatavaṇṇanā niṭṭhitā.