Uggaṇha mama vacanena ārogyaṃ puccha evañca vadehi upajjhāyo maṃ bhante tumhākaṃ santikaṃ pahiṇīti ko nāma te upajjhāyoti ca vutte siggavatthero nāma bhanteti vadeyyāsi ahaṃ ko nāmāti vutte evaṃ vadeyyāsi mama upajjhāyo bhante tumhākaṃ nāmaṃ jānātīti. Evaṃ bhanteti kho tisso sāmaṇero theraṃ abhivādetvā padakkhiṇaṃ katvā anupubbena caṇḍavajjittherassa santikaṃ gantvā vanditvā ekamantaṃ aṭṭhāsi. Thero sāmaṇera kuto āgatosīti āha. Upajjhāyo maṃ bhante tumhākaṃ santikaṃ pahiṇīti. Ko nāma te upajjhāyoti. Siggavatthero nāma bhanteti. Ahaṃ ko nāmāti. Mama upajjhāyo bhante tumhākaṃ nāmaṃ jānātīti. Pattacīvaraṃdāni paṭisāmehīti. Sādhu bhanteti. Sāmaṇero pattacīvaraṃ paṭisāmetvā punadivase pariveṇaṃ sammajjitvā udakadantapoṇaṃ upaṭṭhāpesi. Thero sammajjanaṭṭhānaṃ puna sammajji taṃ udakaṃ chaḍḍetvā aññaṃ udakaṃ āhari tañca dantakaṭṭhaṃ apanetvā aññaṃ dantakaṭṭhaṃ gaṇhi. Evaṃ satta divasāni katvā sattame divase puna pucchi. Sāmaṇero punapi pubbe kathitasadisameva kathesi. Thero suvaco vatāyaṃ brāhmaṇoti sañjānitvā kimatthaṃ āgatosīti āha. Buddhavacanaṃ uggaṇhaṇatthāya bhanteti. Thero uggaṇhadāni sāmaṇerāti vatvā punadivasato pabhūti buddhavacanaṃ paṭṭhapesi. Tisso sāmaṇerova hutvā ṭhapetvā vinayapiṭakaṃ sabbaṃ buddhavacanaṃ uggaṇhi saddhiṃ aṭṭhakathāya. Upasampannakāle pana Avassikova samāno tipiṭakadharo ahosi. Ācariyūpajjhāyā moggalī- puttatissattherassa hatthe sakalaṃ buddhavacanaṃ patiṭṭhāpetvā yāvatāyukaṃ ṭhatvā parinibbāyiṃsu. Moggalīputtatissattheropi aparena samayena kammaṭṭhānaṃ vaḍḍhetvā arahattaṃ patto bahūnaṃ dhammavinayaṃ vācesi.
Tena kho pana samayena bindusārassa ekasataṃ puttā ahesuṃ. Te sabbe asoko attanā saddhiṃ ekamātikaṃ tissakumāraṃ ṭhapetvā ghātesi. Ghātento cattāri vassāni anabhisittova rajjaṃ kāretvā catunnaṃ vassānaṃ accayena tathāgatassa parinibbānato dvinnaṃ vassasatānaṃ upari aṭṭhārasame vasse sakalajambudīpe ekarajjābhisekaṃ pāpuṇi. Abhisekānubhāvena cassa imā rājiddhiyo āgatā. Mahāpaṭhaviyā heṭṭhā yojanappamāṇe āṇā pavattati tathā upari ākāse. Anottattadahato aṭṭhahi kājehi soḷasa pānīyaghaṭe divase divase devatā āharanti yato sāsane uppannasaddho hutvā aṭṭha ghaṭe bhikkhusaṅghassa adāsi. Dve ghaṭe saṭṭhimattānaṃ tipiṭakadharānaṃ bhikkhūnaṃ. Dve ghaṭe aggamahesiyā asandhimittāya. Dve ghaṭe soḷasannaṃ nāṭakitthīsahassānaṃ. Dve ghaṭe attanā paribhuñji. Devatāeva himavante nāgalatādantakaṭṭhannāma atthi siniddhaṃ mudukaṃ rasavantaṃ taṃ divase divase āharanti yena rañño ca mahesiyā ca soḷasannañca nāṭakitthīsahassānaṃ saṭṭhimattānañca bhikkhusahassānaṃ devasikaṃ dantapoṇakiccaṃ nippajjati. Devasikameva cassa devatā agadāmalakaṃ agadaharītakaṃ suvaṇṇavaṇṇañca Gandharasasampannaṃ ambapakkaṃ āharanti. Tathā chandantadahato pañcavaṇṇaṃ nivāsanapārupanaṃ pītakavaṇṇaṃ hatthapuñchanapaṭakaṃ dibbañca pānakaṃ āharanti. Devasikameva panassa sīsanahānagandhaṃ anulepanagandhaṃ pārupanatthāya asuttamayikaṃ sumanapupphapaṭaṃ mahārahañca añjanaṃ nāgabhavanato nāgarājāno āharanti. Chaddantadaheva uṭṭhitassa sālino nava vāhasahassāni divase divase suvakā āharanti. Mūsikā nitthusakaṇe karonti. Ekopi khaṇḍataṇḍulo na hoti. Rañño sabbaṭṭhānesu ayameva taṇḍulo paribhogaṃ gacchati. Madhumakkhikā madhuṃ karonti. Kammārasālāsu acchā kaṭṭhaṃ paharanti. Karavikasakuṇā āgantvā madhurassaraṃ vikūjantā rañño balikammaṃ karonti.