Tissatthero nāma na yo so rañño ekamātiko bhātā tissakumāro nāma. Taṃ kira rājā pattābhiseko uparajje ṭhapesi. So ekadivasaṃ vanacaraṃ gato addasa mahantaṃ migasaṅghaṃ cittāya kīḷikāya
Kīḷantaṃ. Disvānassa etadahosi ime tāva tiṇabhakkhā migā evaṃ kīḷanti ime pana samaṇā rājakule paṇītāni bhojanāni bhuñjitvā mudukāsu seyyāsu sayamānā kiṃva manāpaṃ kīḷitaṃ na kiḷissantīti. So tato āgantvā imaṃ attano vitakkaṃ rañño ārocesi. Rājā aṭṭhāne kukkuccāyitaṃ kumārena handa naṃ evaṃ saññāpessāmīti ekadivasaṃ kenaci kāraṇena kuddho viya ehi satta divase rajjaṃ sampaṭiccha tato taṃ ghātessāmīti maraṇabhayena tajjetvā tamatthaṃ saññāpesi. So kira kumāro sattame divase maṃ mārāpessatīti na cittarūpaṃ nahāyi na bhuñji na supi ativiya lūkhasarīro ahosi. Tato naṃ rājā pucchi kissa tvaṃ evarūpo jātoti. Maraṇabhayena devāti. Are tvaṃ nāma paricchinnamaraṇaṃ sampassamāno vissattho na kīḷasi bhikkhū assāsappassāsūpanibaddhaṃ maraṇaṃ pekkhamānā kathaṃ kīḷissantīti. Tato pabhūti kumāro sāsane pasīdi. So punekadivasaṃ migavaṃ nikkhamitvā araññe anuvicaramāno addasa yonakamahādhammarakkhittattheraṃ aññatarena hatthināgena sālasākhaṃ gahetvā vījiyamānaṃ nisinnaṃ. Disvāna pāmujjajāto cintesi kadā nukho ahampi ayaṃ mahāthero viya pabbajeyyaṃ siyā nukho so divasoti. Thero tassa ajjhāsayaṃ viditvā tassa passantasseva ākāse uppatitvā asokārāme pokkharaṇiyā udakatale ṭhatvā cīvarañca uttarāsaṅgañca ākāse laggetvā nahāyituṃ āraddho. Kumāro therassānubhāvaṃ disvā ativiya pasanno ajjeva pabbajissāmīti Nivattitvā rañño ārocesi pabbajissāmahaṃ devāti. Rājā anekappakāraṃ yācitvā taṃ nivattetuṃ asakkonto asokārāmagamanīyaṃ maggaṃ alaṅkārāpetvā kumāraṃ chaṇavesaṃ gāhāpetvā alaṅkatāya senāya parivārāpetvā vihāraṃ nesi. Yuvarājā kira pabbajissatīti sutvā bahū bhikkhū pattacīvarāni paṭiyādesuṃ. Kumāro padhānagharaṃ gantvā mahādhammarakkhitattherasseva santike pabbaji saddhiṃ purisasatasahassena. Kumārassa pana anupabbajitakānaṃ gaṇanaparicchedo natthi. Kumāro rañño catuvassābhisekakāle pabbajito. Atha añño rañño bhāgineyyo saṅghamittāya sāmiko aggibrahmā nāma kumāro atthi. Saṅghamittā tassa ekameva puttaṃ vijāyi. Sopi yuvarājā pabbajitoti sutvā rājānaṃ upasaṅkamitvā ahampi deva pabbajissāmīti yāci. Pabbaja tātāti ca raññā anuññāto taṃ divasameva pabbaji. Evaṃ anupabbajito uḷāravibhavena khattiyajanena rañño kaniṭṭhabhātā tissattheroti viññeyyo.