Rakkhitatthero pana vanavāsiṃ gantvā ākāse ṭhatvā anamataggapariyāyakathāya vanavāsike pasādesi. Kathāpariyosāne panassa saṭṭhisahassānaṃ dhammābhisamayo ahosi. Sattattiṃsasahassamattā pabbajiṃsu. Pañca vihārasatāni patiṭṭhahiṃsu. Evaṃ so tattha sāsanaṃ patiṭṭhāpesi.

Gantvāna rakkhitatthero vanavāsiṃ mahiddhiko

antalikkhe ṭhito tattha desesi anamataggiyanti.

Yonakadhammarakkhitattheropi aparantakaṃ gantvā aggikkhandhūpamasuttantakathāya aparantake pasādetvā sattattiṃsapāṇasahassāni dhammāmataṃ pāyesi. Khattiyakulatoyeva purisasahassaṃ pabbaji. Samadhikāni ca cha itthīsahassāni. Evaṃ so tattha sāsanaṃ patiṭṭhāpesi.