Majjhimatthero pana kassapagottattherena aḷakadevattherena dundubhissarattherena sahassadevattherena ca saddhiṃ himavantappadesabhāgaṃ gantvā dhammacakkappavattanasuttantakathāya taṃ padesaṃ pasādetvā asītipāṇakoṭiyo maggaphalaratanāni paṭilābhesi. Pañcapi cete therā pañca raṭṭhāni pasādesuṃ. Ekamekassa santike satasahassamattā pabbajiṃsu. Evaṃ te tattha sāsanaṃ patiṭṭhāpesuṃ.

Gantvāna majjhimatthero himavantaṃ pasādayi

yakkhasenaṃ pakāsento dhammacakkappavattanti.

Soṇakattheropi saddhiṃ uttarattherena suvaṇṇabhūmiṃ agamāsi. Tena ca samayena tattha ekā rakkhasī samuddato nikkhamitvā rājakule jāte jāte dārake khādati. Taṃdivasameva rājakule eko dārako jāto hoti. Manussā theraṃ disvā rakkhasānaṃ sahāyako esoti maññamānā āvudhāni gahetvā theraṃ paharitukāmā Gacchanti. Thero kiṃ tumhe āvudhahatthā āgacchathāti āha. Te āhaṃsu rājakule jāte jāte dārake rakkhasā khādanti tesaṃ tumhe sahāyakāti. Thero na mayaṃ rakkhasasahāyakā samaṇā nāma mayaṃ viratā pāṇātipātā .pe. Viratā majjapānā ekabhattikā sīlavanto brahmacārino kalyāṇadhammāti āha. Tasmiṃyeva ca khaṇe sā rakkhasī saparivārā samuddato nikkhami rājakule dārako jāto taṃ khādissāmāti. Manussā taṃ disvā esā bhante rakkhasī āgacchatīti bhītā viraviṃsu. Thero rakkhasehi dviguṇe attabhāve nimminitvā tehi attabhāvehi taṃ rakkhasiṃ saparisaṃ majjhe katvā ubhosu passesu parikkhipi. Tassā saparisāya etadahosi addhā imehi idaṃ ṭhānaṃ laddhaṃ bhavissati mayaṃ pana imesaṃ bhakkhā bhavissāmāti. Sabbe rakkhasā vegasā palāyiṃsu. Theropi te yāva adassanaṃ tāva palāpetvā dīpassa samantato ārakkhaṃ ṭhapesi. Tasmiṃ pana samaye sannipatitaṃ mahājanakāyaṃ brahmajālasuttantakathāya pasādetvā saraṇesu ca sīlesu ca patiṭṭhāpesi. Saṭṭhisahassānaṃ panettha dhammābhisamayo ahosi. Kuladārakānaṃ aḍḍhuḍḍhāni sahassāni pabbajiṃsu. Kuladhītānaṃ diyaḍḍhasahassaṃ. Evaṃ so tattha sāsanaṃ patiṭṭhāpesi. Tato pabhūti rājakule jātadārakānaṃ soṇuttaranāmameva karonti.