tevijjā iddhipattā ca cetopariyāyakovidā

khīṇāsavā arahanto bahū buddhassa sāvakāti. Bhante kena āgatatthāti. Neva mahārāja udakena na thalenāti. Rājā ākāsena āgatāti aññāsi. Thero atthi nukho rañño paññāveyyattikanti vīmaṃsanatthāya āsannaṃ ambarukkhaṃ ārabbha pañhaṃ pucchi kiṃnāmo ayaṃ mahārāja rukkhoti. Ambarukkho nāma bhanteti. Imaṃ pana mahārāja ambaṃ muñcitvā añño ambo atthi natthīti. Atthi bhante aññepi bahū ambarukkhāti. Imañca ambaṃ te ca ambe muñcitvā atthi nukho mahārāja aññe rukkhāti. Atthi bhante te pana na ambarukkhāti. Aññe ambe ca anambe ca muñcitvā atthi pana añño rukkhoti. Ayameva bhante ambarukkhoti. Sādhu mahārāja Paṇḍitosi atthi pana te mahārāja ñātakāti. Atthi me bhante bahū janāti. Te muñcitvā aññe keci aññātakāpi atthi mahārājāti. Aññātakā bhante ñātakehi bahutarāti. Tava ñātake ca aññātake ca muñcitvā atthi añño koci mahārājāti. Ahaṃ bhanteti. Sādhu mahārāja attā nāma attano neva ñātako na aññātakoti. Atha thero paṇḍito rājā sakkissati dhammaṃ aññātunti cūḷahatthipadopamasuttantaṃ kathesi. Kathāpariyosāne rājā tīsu saraṇesu patiṭṭhahi saddhiṃ cattāḷīsāya pāṇasahassehi. Taṃ khaṇaṃyeva ca rañño bhattaṃ āhariyittha. Rājā ca suttantaṃ suṇanto evaṃ aññāsi na imesaṃ imasmiṃ kāle bhojanaṃ kappatīti. Apucchitvā pana bhuñjituṃ ayuttanti cintetvā bhuñjissatha bhanteti pucchi. Na mahārāja amhākaṃ imasmiṃ kāle bhojanaṃ kappatīti. Kasmiṃ kāle bhante kappatīti. Aruṇuggamanato paṭṭhāya yāva majjhantikasamayā mahārājāti. Gacchāma bhante nagaranti. Alaṃ mahārāja idheva vasissāmāti. Sace bhante tumhe vasatha ayaṃ dārako āgacchatūti. Mahārāja ayaṃ dārako āgataphalo viññātasāsano pabbajjāpekkho idāni pabbajissatīti. Rājā tenahi bhante sve rathaṃ pesissāmi taṃ abhiruhitvā āgaccheyyāthāti vatvā vanditvā pakkāmi. Thero acirapakkantassa rañño sumanasāmaṇeraṃ āmantesi ehi tvaṃ sumana dhammassavanakālaṃ ghosehīti. Bhante kittakaṃ ṭhānaṃ sāvento ghosemīti.