Sammāsambuddho kira imaṃ dīpaṃ dharamānakālepi tikkhattuṃ agamāsi. Paṭhamaṃ yakkhadamanatthaṃ ekakova āgantvā yakkhe dametvā mayi parinibbute imasmiṃ dīpe mama sāsanaṃ patiṭṭhahissatīti tambapaṇṇidīpe rakkhaṃ karonto tikkhattuṃ dīpaṃ āvijjhi. Dutiyaṃ mātulabhāgineyyānaṃ nāgarājūnaṃ damanatthāya ekakova āgantvā te dametvā agamāsi. Tatiyaṃ pañcasatabhikkhuparivāro āgantvā mahācetiyaṭṭhāne ca thūpārāmacetiyaṭṭhāne ca mahābodhippatiṭṭhāne ca mutiṅgaṇacetiyaṭṭhāne ca dīghavāpīcetiyaṭṭhāne ca kalyāṇiyacetiyaṭṭhāne ca nirodhasamāpattiṃ samāpajjitvā nisīdi. Idamassa catutthaṃ dhātusarīrena āgamanaṃ. Dhātusarīrato ca panassa nikkhantaudakaphusitehi sakale tambapaṇṇitthale na koci phuṭṭhokāso nāma ahosi. Evamassa taṃ dhātusarīraṃ udakaphusitehi tambapaṇṇitthalassa pariḷāhaṃ vūpasametvā
Mahājanassa pāṭihāriyaṃ dassetvā otaritvā rañño matthake patiṭṭhāsi. Rājā saphalaṃ manussapaṭilābhaṃ maññamāno mahantaṃ sakkāraṃ karitvā dhātuṃ patiṭṭhāpesi. Saha dhātupatiṭṭhānena mahābhūmicālo ahosi. Tasmiñca pana dhātupāṭihāriye cittaṃ pasādetvā rañño bhātā abhayo nāma rājakumāro purisasahassena saddhiṃ pabbaji. Vetāligāmato pañca dārakasatāni pabbajiṃsu. Tathā dvāramaṇḍalādīhi gāmakehi nikkhamitvā pañca pañca dārakasatāni. Sabbānipi antonagarato ca bahinagarato ca pabbajitāni tiṃsa bhikkhusahassāni ahesuṃ. Niṭṭhite pana thūpasmiṃ rājā ca rājabhattikā ca deviyo ca devanāgayakkhānampi vimhayakaraṃ paccekaṃ paccekaṃ pūjamakaṃsu. Niṭṭhitāya pana dhātupūjāya patiṭṭhite dhātuvare mahindatthero meghavanuyyānameva gantvā vāsaṃ kappesi.
Tasmiṃ kho pana samaye anuḷā devī pabbajitukāmā hutvā rañño ārocesi. Rājā tassā vacanaṃ sutvā therametadavoca anuḷā bhante devī pabbajitukāmā pabbājetha nanti. Na mahārāja amhākaṃ mātugāmaṃ pabbājetuṃ kappati pāṭaliputte pana mayhaṃ bhaginī saṅghamittattherī nāma atthi taṃ pakkosāpehi imasmiṃ ca pana mahārāja dīpe purimakānaṃ tiṇṇaṃ sammāsambuddhānaṃ bodhi patiṭṭhāsi amhākaṃpi bhagavato sarasaraṃsijālavisajjanakena bodhinā idha patiṭṭhātabbaṃ tasmā tathā sāsanaṃ pahiṇeyyāsi yathā saṅghamittā bodhiṃ gahetvā āgaccheyyāti. Sādhu bhanteti rājā therassa Vacanaṃ sampaṭicchitvā amaccehi saddhiṃ mantetvā ariṭṭhaṃ nāma attano bhāgineyyaṃ āha sakkissasi tvaṃ pāṭaliputtaṃ gantvā mahābodhinā saddhiṃ ayyaṃ saṅghamittattheriṃ ānetunti. Sakkissāmi deva sace me pabbajjaṃ anujānissasīti. Gaccha tāta theriṃ ānetvā pabbajāhīti. So rañño ca therassa ca sāsanaṃ gahetvā therassa adhiṭṭhānabalena ekadivaseneva jambukolapaṭṭanaṃ gantvā nāvaṃ abhiruhitvā samuddaṃ atikkamitvā pāṭaliputtameva agamāsi. Anuḷāpi kho devī pañcahi kaññāsatehi pañcahi ca antepurikāsatehi saddhiṃ dasa sīlāni samādayitvā kāsāyāni vatthāni acchādetvā nagarassa ekadese upassayaṃ kārāpetvā nivāsaṃ kappesi. Ariṭṭhopi taṃdivasameva gantvā rañño sāsanaṃ appesi evañca avoca putto te deva mahindatthero evamāha sahāyakassa kira te devānaṃpiyatissassa bhātu jāyā anuḷā nāma devī pabbajitukāmā taṃ pabbājetuṃ ayyaṃ saṅghamittattheriṃ pahiṇatha ayyāyeva ca saddhiṃ mahābodhinti. Therassa sāsanaṃ ārocetvā saṅghamittattheriṃ upasaṅkamitvā evamāha ayye tumhākaṃ bhātā mahindatthero maṃ tumhākaṃ santike pesesi devānaṃpiyatissarañño bhātu jāyā anuḷā devī pañcahi kaññāsatehi pañcahi ca antepurikāsatehi saddhiṃ pabbajitukāmā taṃ kira āgantvā pabbājethāti. Sā tāvadeva turitaturitā rañño santikaṃ gantvā evamāha mahārāja mayhaṃ bhātā mahindatthero evaṃ pahiṇi rañño kira bhātu jāyā anuḷā nāma devī pañcahi kaññāsatehi pañcahi ca antepurikāsatehi saddhiṃ Pabbajitukāmā mayhaṃ āgamanaṃ udikkhati icchāmahaṃ mahārāja tambapaṇṇidīpaṃ gantunti. Rājā āha amma puttopi me mahindatthero nattā ca sumanasāmaṇero maṃ chinnahatthaṃ viya karontā tambapaṇṇidīpaṃ gatā tassa mayhaṃ tepi apassantassa uppanno soko tava mukhaṃ passantassa vūpasamati alaṃ amma mā agamāsīti. Bhāriyaṃ me mahārāja bhātuno vacanaṃ anuḷāpi khattiyā itthīsahassaparivutā pabbajjāpurekkhārā maṃ paṭimāneti gacchāmahaṃ mahārājāti. Tenahi amma mahābodhiṃ gahetvā gacchāhīti.