[๓๒] กถญฺจ ภิกฺขเว อปฺปจฺจกฺขาตา โหติ สิกฺขา ฯ อิธ ภิกฺขเว ภิกฺขุนา ๑ เยหิ อากาเรหิ เยหิ ลิงฺเคหิ เยหิ นิมิตฺเตหิ สิกฺขา ปจฺจกฺขาตา โหติ เตหิ อากาเรหิ เตหิ ลิงฺเคหิ เตหิ นิมิตฺเตหิ อุมฺมตฺตโก สิกฺขํ ปจฺจกฺขาติ ฯ อปฺปจฺจกฺขาตา โหติ สิกฺขา ฯ อุมฺมตฺตกสฺส สนฺติเก สิกฺขํ ปจฺจกฺขาติ ฯ อปฺปจฺจกฺขาตา โหติ สิกฺขา ฯ ขิตฺตจิตฺโต สิกฺขํ ปจฺจกฺขาติ ฯ อปฺปจฺจกฺขาตา โหติ สิกฺขา ฯ ขิตฺตจิตฺตสฺส สนฺติเก สิกฺขํ ปจฺจกฺขาติ ฯ อปฺปจฺจกฺขาตา โหติ สิกฺขา ฯ เวทนฏฺโฏ สิกฺขํ ปจฺจกฺขาติ ฯ อปฺปจฺจกฺขาตา โหติ สิกฺขา ฯ เวทนฏฺฏสฺส สนฺติเก สิกฺขํ ปจฺจกฺขาติ ฯ อปฺปจฺจกฺขาตา โหติ สิกฺขา ฯ เทวตาย สนฺติเก สิกฺขํ ปจฺจกฺขาติ ฯ อปฺปจฺจกฺขาตา โหติ สิกฺขา ฯ ติรจฺฉานคตสฺส สนฺติเก สิกฺขํ ปจฺจกฺขาติ ฯ #๑ ยุโรปิยมรมฺมโปตฺถเกสฺวายํ ปาโฐ น ทิสฺสติ ฯ อปฺปจฺจกฺขาตา โหติ สิกฺขา ฯ อริยเกน มิลกฺขกสฺส สนฺติเก สิกฺขํ ปจฺจกฺขาติ ฯ โส เจ ๑น ปฏิวิชานาติ อปฺปจฺจกฺขาตา โหติ สิกฺขา ฯ มิลกฺขเกน อริยกสฺส สนฺติเก สิกฺขํ ปจฺจกฺขาติ ฯ โส เจ น ปฏิวิชานาติ อปฺปจฺจกฺขาตา โหติ สิกฺขา ฯ อริยเกน อริยกสฺส สนฺติเก สิกฺขํ ปจฺจกฺขาติ ฯ โส เจ น ปฏิวิชานาติ อปฺปจฺจกฺขาตา โหติ สิกฺขา ฯ มิลกฺขเกน มิลกฺขกสฺส สนฺติเก สิกฺขํ ปจฺจกฺขาติ ฯ โส เจ น ปฏิวิชานาติ อปฺปจฺจกฺขาตา โหติ สิกฺขา ฯ ทวาย สิกฺขํ ปจฺจกฺขาติ ฯ อปฺปจฺจกฺขาตา โหติ สิกฺขา ฯ รวาย สิกฺขํ ปจฺจกฺขาติ ฯ อปฺปจฺจกฺขาตา โหติ สิกฺขา ฯ อสาเวตุกาโม สาเวติ ฯ อปฺปจฺจกฺขาตา โหติ สิกฺขา ฯ สาเวตุกาโม น สาเวติ ฯ อปฺปจฺจกฺขาตา โหติ สิกฺขา ฯ อวิญฺญุสฺส สาเวติ ฯ อปฺปจฺจกฺขาตา โหติ สิกฺขา ฯ วิญฺญุสฺส น สาเวติ ฯ อปฺปจฺจกฺขาตา โหติ สิกฺขา ฯ สพฺพโส วา ปน น สาเวติ ฯ อปฺปจฺจกฺขาตา โหติ สิกฺขา ฯ เอวํ โข ภิกฺขเว อปฺปจฺจกฺขาตา โหติ สิกฺขา ฯ

[๓๓] เมถุนธมฺโม นาม โย โส อสทฺธมฺโม คามธมฺโม วสลธมฺโม ทุฏฺฐุลฺลํ โอทกนฺติกํ รหสฺสํ ทฺวยํ ทฺวยสมาปตฺติ เอโส เมถุนธมฺโม นาม ฯ