[๔๖๕] ปุริโส ภิกฺขุํ ปหิณติ คจฺฉ ภนฺเต อิตฺถนฺนามํ มาตุรกฺขิตํ พฺรูหิ โหหิ กิร อิตฺถนฺนามสฺส ภริยา ธนกฺกีตาติ ปฏิคฺคณฺหาติ วีมํสติ ปจฺจาหรติ อาปตฺติ สงฺฆาทิเสสสฺส ฯ ปุริโส ภิกฺขุํ ปหิณติ คจฺฉ ภนฺเต อิตฺถนฺนามํ มาตุรกฺขิตญฺจ ปิตุรกฺขิตญฺจ พฺรูหิ โหถ กิร อิตฺถนฺนามสฺส ภริยาโย ธนกฺกีตา จ ฉนฺทวาสินี จาติ ปฏิคฺคณฺหาติ วีมํสติ ปจฺจาหรติ อาปตฺติ สงฺฆาทิเสสสฺส ฯ ปุริโส ภิกฺขุํ ปหิณติ คจฺฉ ภนฺเต อิตฺถนฺนามํ มาตุรกฺขิตญฺจ ปิตุรกฺขิตญฺจ มาตาปิตุรกฺขิตญฺจ พฺรูหิ โหถ กิร อิตฺถนฺนามสฺส ภริยาโย ธนกฺกีตา จ ฉนฺทวาสินี จ โภควาสินี จาติ ปฏิคฺคณฺหาติ วีมํสติ ปจฺจาหรติ อาปตฺติ สงฺฆาทิเสสสฺส ฯ (เอวํ อุภโตพทฺธกํ กาตพฺพํ ฯ) อิทํ สพฺพมูลกํ ฯ
[๔๖๖] ปุริโส ภิกฺขุํ ปหิณติ คจฺฉ ภนฺเต อิตฺถนฺนามํ มาตุ- รกฺขิตญฺจ ปิตุรกฺขิตญฺจ มาตาปิตุรกฺขิตญฺจ ภาตุรกฺขิตญฺจ ภคินี- รกฺขิตญฺจ ญาติรกฺขิตญฺจ โคตฺตรกฺขิตญฺจ ธมฺมรกฺขิตญฺจ สารกฺขญฺจ สปริทณฺฑญฺจ พฺรูหิ โหถ กิร อิตฺถนฺนามสฺส ภริยาโย ธนกฺกีตา จ ฉนฺทวาสินี จ โภควาสินี จ ปฏวาสินี จ โอทปตฺตกินี จ โอภตจุมฺพฏา จ ทาสี จ ภริยา จ กมฺมการี จ ภริยา จ ธชาหฏา จ มุหุตฺติกา จาติ ปฏิคฺคณฺหาติ วีมํสติ ปจฺจาหรติ อาปตฺติ สงฺฆาทิเสสสฺส ฯ อุภโตพทฺธกํ นิฏฺฐิตํ ฯ
[๔๖๗] ปุริสสฺส มาตา ภิกฺขุํ ปหิณติ ฯเปฯ ปุริสสฺส ปิตา ภิกฺขุํ ปหิณติ ฯเปฯ ปุริสสฺส มาตาปิตโร ภิกฺขุํ ปหิณนฺติ ฯเปฯ ปุริสสฺส ภาตา ภิกฺขุํ ปหิณติ ฯเปฯ ปุริสสฺส ภคินี ภิกฺขุํ ปหิณติ ฯเปฯ ปุริสสฺส ญาตกา ภิกฺขุํ ปหิณนฺติ ฯเปฯ ปุริสสฺส โคตฺตา ภิกฺขุํ ปหิณนฺติ ฯเปฯ ปุริสสฺส สหธมฺมิกา ภิกฺขุํ ปหิณนฺติ ฯ (ปุริสสฺส เปยฺยาโล วิตฺถาเรตพฺโพ ฯ อุภโตพทฺธกํ ยถา ปุริมนเยน ตเถว วิตฺถาเรตพฺพํ ฯ)
[๔๖๘] มาตุรกฺขิตาย มาตา ภิกฺขุํ ปหิณติ คจฺฉ ภนฺเต อิตฺถนฺนามํ พฺรูหิ โหตุ อิตฺถนฺนามสฺส ภริยา ธนกฺกีตาติ ปฏิคฺคณฺหาติ วีมํสติ ปจฺจาหรติ อาปตฺติ สงฺฆาทิเสสสฺส ฯ มาตุรกฺขิตาย มาตา ภิกฺขุํ ปหิณติ คจฺฉ ภนฺเต อิตฺถนฺนามํ พฺรูหิ โหตุ อิตฺถนฺนามสฺส ภริยา ฉนฺทวาสินี โภควาสินี ปฏวาสินี โอทปตฺตกินี โอภตจุมฺพฏา ทาสี จ ภริยา จ กมฺมการี จ ภริยา จ ธชาหฏา มุหุตฺติกาติ ปฏิคฺคณฺหาติ วีมํสติ ปจฺจาหรติ อาปตฺติ สงฺฆาทิเสสสฺส ฯ นิกฺเขปปทานิ ฯ