[๔๗๓] ปิตุรกฺขิตาย ปิตา ภิกฺขุํ ปหิณติ ฯ มาตาปิตุรกฺขิตาย มาตาปิตโร ภิกฺขุํ ปหิณนฺติ ฯ ภาตุรกฺขิตาย ภาตา ภิกฺขุํ ปหิณติ ฯ ภคินีรกฺขิตาย ภคินี ภิกฺขุํ ปหิณติ ฯ ญาติรกฺขิตาย ญาตกา ภิกฺขุํ ปหิณนฺติ ฯ โคตฺตรกฺขิตาย โคตฺตา ภิกฺขุํ ปหิณนฺติ ฯ ธมฺมรกฺขิตาย สหธมฺมิกา ภิกฺขุํ ปหิณนฺติ ฯ สารกฺขาย เยน ปริคฺคหิตา โหติ โส ภิกฺขุํ ปหิณติ ฯ สปริทณฺฑาย เยน ทณฺโฑ ฐปิโต โหติ โส ภิกฺขุํN ปหิณติ คจฺฉ ภนฺเต อิตฺถนฺนามํ พฺรูหิ โหตุ อิตฺถนฺนามสฺส ภริยา ธนกฺกีตาติ ปฏิคฺคณฺหาติ วีมํสติ ปจฺจาหรติ อาปตฺติ สงฺฆาทิเสสสฺส ฯ สปริทณฺฑาย เยน ทณฺโฑ ฐปิโต โหติ โส ภิกฺขุํ ปหิณติ คจฺฉ ภนฺเต อิตฺถนฺนามํ พฺรูหิ โหตุ อิตฺถนฺนามสฺส ภริยา ฉนฺทวาสินี โภควาสินี ปฏวาสินี โอทปตฺตกินี โอภตจุมฺพฏา ทาสี จ ภริยา จ กมฺมการี จ ภริยา จ ธชาหฏา มุหุตฺติกาติ ปฏิคฺคณฺหาติ วีมํสติ ปจฺจาหรติ อาปตฺติ สงฺฆาทิเสสสฺส ฯ นิกฺเขปปทานิ ฯ

[๔๗๔] สปริทณฺฑาย เยน ทณฺโฑ ฐปิโต โหติ โส ภิกฺขุํ ปหิณติ คจฺฉ ภนฺเต อิตฺถนฺนามํ พฺรูหิ โหตุ อิตฺถนฺนามสฺส ภริยา ธนกฺกีตา จ ฉนฺทวาสินี จ ฯเปฯ ธนกฺกีตา จ มุหุตฺติกา จาติ ปฏิคฺคณฺหาติ วีมํสติ ปจฺจาหรติ อาปตฺติ สงฺฆาทิเสสสฺส ฯ ขณฺฑจกฺกํ ฯ

[๔๗๕] สปริทณฺฑาย เยน ทณฺโฑ ฐปิโต โหติ โส ภิกฺขุํ ปหิณติ คจฺฉ ภนฺเต อิตฺถนฺนามํ พฺรูหิ โหตุ อิตฺถนฺนามสฺส ภริยา ฉนฺทวาสินี จ โภควาสินี จ ฯเปฯ ฉนฺทวาสินี จ มุหุตฺติกา จ ฯ ฉนฺทวาสินี จ ธนกฺกีตา จาติ ปฏิคฺคณฺหาติ วีมํสติ ปจฺจาหรติ อาปตฺติ สงฺฆาทิเสสสฺส ฯ พทฺธจกฺกํ ฯ มูลํ สงฺขิตฺตํ ฯ

[๔๗๖] สปริทณฺฑาย เยน ทณฺโฑ ฐปิโต โหติ โส ภิกฺขุํ ปหิณติ คจฺฉ ภนฺเต อิตฺถนฺนามํ พฺรูหิ โหตุ อิตฺถนฺนามสฺส ภริยา มุหุตฺติกา จ ธนกฺกีตา จ ฯเปฯ มุหุตฺติกา จ ธชาหฏา จาติ ปฏิคฺคณฺหาติ วีมํสติ ปจฺจาหรติ อาปตฺติ สงฺฆาทิเสสสฺส ฯ เอกมูลกํ นิฏฺฐิตํ ฯ เอวํ ทุมูลกํปิ ยาวนวมูลกํ กาตพฺพํ ฯ อิทํ ทสมูลกํ ฯ