TIPITAKA Volume 1 : PALI ROMAN Vinaya Pitaka Vol 1 : Vinaya. Mahāvi (1)

[491] Anāpatti saṅghassa vā cetiyassa vā gilānassa vā karaṇīyena gacchati ummattakassa ādikammikassāti.

[492] Suttā matā ca nikkhantā anitthī itthipaṇḍakā kalahaṃ katvāna sammodi sañcarittañca paṇḍaketi.

[493] Tena kho pana samayena aññataro puriso aññataraṃ bhikkhuṃ āṇāpeti gaccha bhante itthannāmaṃ itthiṃ vīmaṃsāti . so gantvā manusse pucchi kahaṃ itthannāmāti . suttā bhanteti . tassa kukkuccaṃ ahosi kacci nu kho ahaṃ saṅghādisesassa āpatti āpannoti. Bhagavato etamatthaṃ ārocesi . anāpatti bhikkhu saṅghādisesassa āpatti dukkaṭassāti. {493.1} Tena kho pana samayena aññataro puriso aññataraṃ bhikkhuṃ āṇāpeti gaccha bhante itthannāmaṃ itthiṃ vīmaṃsāti . so gantvā manusse pucchi kahaṃ itthannāmāti . matā bhanteti . Tassa kukkuccaṃ ahosi .pe. anāpatti bhikkhu saṅghādisesassa āpatti dukkaṭassāti. {493.2} Tena kho pana samayena aññataro puriso aññataraṃ bhikkhuṃ āṇāpeti gaccha bhante itthannāmaṃ itthiṃ vīmaṃsāti. So gantvā manusse pucchi kahaṃ itthannāmāti . nikkhantā bhanteti .pe. anitthī bhanteti .pe. itthīpaṇḍakā bhanteti . tassa kukkuccaṃ ahosi .pe. Anāpatti bhikkhu saṅghādisesassa āpatti dukkaṭassāti.