อถาคู สหภู เทวาติ อถ สหภู นาม เทวา อาคตา. ชลมคฺคิสิขาริวาติ อคฺคิสิขา วิย ชลนฺตา. ชลมคฺคิ จ สิขาริวาติ อิมานิ เตสํ นามานีติปิ วุตฺตํ. อริฏฺฐกา จ โรชา จาติ อริฏฺฐกเทวา จ โรชเทวา จ. อุมฺมาปุปฺผนิภาสิโนติ อุมฺมาปุปฺผเทวา นาม เอเต เทวา. อุมฺมาปุปฺผสทิสา หิ เตสํ สรีราภา, ตสฺมา "อุมฺมาปุปฺผนิภาสิโน"ติ วุจฺจติ.

วรุณา สหธมฺมา จาติ เอเต จ เทฺว ชนา. อจฺจุตา จ อเนชกาติ อจฺจุตเทวตา จ อเนชกเทวตา จ. สุเลยฺยรุจิรา อาคูติ สุเลยฺยา จ รุจิรา จ อาคตา. อาคู วาสวเนสิโนติ วาสวเนสีเทวา นาม อาคตา. ทเสเต ทสธา กายาติ เอเตปิ ทส เทวกายา ทสธาว อาคตา.

สมานา มหาสมานาติ สมานา จ มหาสมานา จ. มานุสา มานุสุตฺตมาติ มานุสา จ มานุสุตฺตมา จ. ขิฑฺฑาปทูสิกา อาคู, อาคู มโนปทูสิกาติ ขิฑฺฑาปทูสิกา มโนปทูสิกา จ เทวา อาคตา.

อถาคู หรโย เทวาติ หริเทวา นาม อาคตา. เย จ โลหิตวาสิโนติ โลหิตวาสิโน จ อาคตา. ปารคา มหาปารคาติ เอเต จ ทุวิธา อาคตา. ทเสเต ทสธา กายาติ เอเตปิ ทส เทวกายา ทสธาว อาคตา.