Mahāgovindavatathuvaṇṇanā

[305] Bhavamatthu bhavantaṃ jotipālanti bhoto jotipālassa bhavo vuḍḍhi visesādhigamo sabbaṃ kalyāṇaṃ ceva mahāmaṅgalañca hotūti attho.

Sammodanīyaṃ kathanti "alaṃ mahārāja mā cintayi, dhuvadhammo esa sabbasattānan"ti ādinā nayena maraṇapaṭisaṃyuttaṃ sokavinodanaṃ paṭisanthārakathaṃ pariyosāpetvā. Māno bhavaṃ jotipālo māṇavo anusāsaniyā paccabyāhāsīti mā paṭibyāhāsi, "anusāsā"ti vutto "nāhaṃ anusāsāmī"ti evaṃ no mā anusāsaniyā paccakkhāsīti attho. Abhisambhosīti saṃvidahi paṭṭhapesi.

Manussā evamāhaṃsūti taṃ pitarā mahāpaññataraṃ sabbakiccāni anusāsantaṃ sabbakammante abhisambhavantaṃ disvā tuṭṭhacittā govindo vata bho brāhmaṇo, mahāgovindo vata bho brāhmaṇoti evaṃ āhaṃsu. Idaṃ vuttaṃ hoti "govindo vata bho brāhmaṇo ahosi etassa pitā, ayaṃ pana mahāgovindo vata bho brāhmaṇo"ti.