[191] Iṅghāti codanaṭṭhe nipāto. Acchodakāti pasannodakā. Sātodakāti madhurodakā. Sītodakāti sītalasalilā. Setodakāti nikkaddamā. Suppatitthāti sundaratitthā.

Pukkusamallaputtavatthuvaṇṇanā

[192] Pukkusoti tassa nāmaṃ. Mallaputtoti mallarājaputto. Mallā kira vārena rajjaṃ kārenti. Yāva yesaṃ vāro na pāpuṇāti, tāva vāṇijjaṃ karonti. Ayaṃpi vāṇijjameva karonto pañca sakaṭasatāni yojetvā purato vāte vāyante purato gacchati, pacchā vāte vāyante satthavāhaṃ purato pesetvā sayaṃ pacchā gacchati. Tadā pana pacchā vāto vāyi, tasmā esa purato satthavāhaṃ pesetvā sabbaratanayāne nisīditvā kusinārāto nikkhamitvā