Āgū pañcasikho ceva, timbarū suriyavacchasā"ti ime devarājāno.

Tattha devasūtoti devasārathi. Cittasenoti citto ca seno ca cittaseno ca. Gandhabboti ayaṃ cittaseno gandhabbakāyiko devaputto. Na kevalañcesa, sabbepete panādādayo gandhabbāeva. Naḷorājāti naḷakāradevaputto nāma eko. Janosabhoti janavasabho devaputto. Āgū pañcasikho cevāti pañcasikho ceva devaputto āgato. Timbarūti timbaru nāma gandhabbadevarājā. Suriyavacchasāti tasseva dhītā.

Ete caññe ca rājāno, gandhabbā saha rājubhīti ete ca nāmavasena vuttagandhabbarājāno aññe ca etehi rājūbhi saddhiṃ bahū gandhabbā. Modamānā abhikkāmuṃ, bhikkhūnaṃ samitiṃ vananti haṭṭhatuṭṭhacittā bhikkhūnaṃ samitiṃ imaṃ vanaṃ āgatāta attho.

[338] Athāgū nābhasā nāgā, vesālā sahatacchakāti nabhasadahavāsikā ca vesālivāsikā ca nāgā saha tacchakanāgaparisāya āgatāti attho. Kambalassatarāti kambalo ca assataro ca. Ete kira sinerupāde vasanti, supaṇṇehipi anuddharaṇīyā mahesakkhā nāgā. Pāyāgā saha ñātibhīti payāgapaṭṭanavāsino ca nāgā saha ñātisaṅghena āgatā.