Asucīti amanāPo. Asucisaṅkhātoti asucikoṭṭhāsabhūto asucīti ñāto vā. Duggandhoti kuṇapagandho. Jegucchoti jigucchitabbayutto. Paṭikūloti dassaneneva paṭighāvaho. Ubbāhatīti divasassa dvikkhattuṃ nhātvā tikkhattuṃ vatthāni parivaṭṭetvā alaṅkatapaṭimaṇḍitānaṃ cakkavattiādīnaṃpi manussānaṃ gandho yojanasate ṭhitānaṃ devānaṃ kaṇṭhe āsattakuṇapaṃ viya bādhati.

[416] Puna pāṇātipātādipañcasīlāni samādāya vattentānaṃ vasena vadati. Tāvatiṃsānanti idañca dūre nibbattā tāva mā āgacchantu, ime kasmā na entīti vadati.

Jaccandhūpamāvaṇṇanā

[418] Jaccandhūpamo maññe paṭibhāsīti jaccandho viya upaṭṭhāsi. Araññavanapatthānīti āraññikaṅgayuttatāya araññāni mahāvanasaṇḍatāya vanapatthāni. Pantānīti dūrāni.