[๑๑] อุปฏฺฐากปริจฺเฉเท ปน ๑- อานนฺโทติ นิพทฺธุปฏฺฐากภาวํ สนฺธาย วุตฺตํ. ภควโต หิ ปฐมโพธิยํ อนิพทฺธา ๒- อุปฏฺฐากา อเหสุํ. ๒- เอกทา นาคสมาโล ปตฺตจีวรํ คเหตฺวา วิจริ, เอกทา นาคิโต, เอกทา อุปวาโณ, เอกทา สุนกฺขตฺโต, เอกทา จุนฺโท สมณุทฺเทโส, เอกทา สาคโต, เอกทา เมฆิโย. ตตฺถ เอกทา ภควา นาคสมาลตฺเถเรน สทฺธึ อทฺธานมคฺคปฏิปนฺโน เทฺวธาปถํ ปตฺโต. เถโร มคฺคา โอกฺกมฺม "ภควา อหํ อิมินา มคฺเคน คจฺฉามี"ติ อาห. อถ นํ ภควา "เอหิ ภิกฺขุ อิมินา มคฺเคน คจฺฉามา"ติ อาห. โส "หนฺท ภควา ตุมฺหากํ ปตฺตจีวรํ คณฺหถ, อหํ อิมินา คคฺเคน คจฺฉามี"ติ วตฺวา ปตฺตจีวรํ ภูมิยํ ๓- ฐเปตุํ อารทฺโธ. อถ นํ ภควา "อาหร ภิกฺขู"ติ วตฺวา ปตฺตจีวรํ คเหตฺวา คโต. ตสฺสปิ ภิกฺขุโน อิตเรน มคฺเคน คจฺฉโต โจรา ปตฺตจีวรญฺเจว หรึสุ, สีสํ จ ภินฺทึสุ. โส "ภควา อิทานิ เม ปฏิสรณํ, น อญฺโญ"ติ จินฺเตตฺวา โลหิเตน คลิเตน ๔- ภควโต สนฺติกํ อาคมิ. ๕- "กิมิทํ ภิกฺขู"ติ จ วุตฺเต ตํ ปวุตฺตึ อาโรเจสิ. อถ นํ ภควา "มา จินฺตยิ ภิกฺขุ, เอตํ ๖- การณํเยว ตํ นิวารยิมฺหา"ติ ๖- วตฺวา ตํ สมสฺสาเสสิ.

[๑๒] ปิติปริจฺเฉโท อุตฺตานตฺโถเยว.