อสุจีติ อมนาโป. อสุจิสงฺขาโตติ อสุจิโกฏฺฐาสภูโต อสุจีติ ญาโต วา. ทุคฺคนฺโธติ กุณปคนฺโธ. เชคุจฺโฉติ ชิคุจฺฉิตพฺพยุตฺโต. ปฏิกูโลติ ทสฺสเนเนว ปฏิฆาวโห. อุพฺพาหตีติ ๒- ทิวสสฺส ทฺวิกฺขตฺตุํ นฺหาตฺวา ติกฺขตฺตุํ วตฺถานิ ปริวฏฺเฏตฺวา อลงฺกตปฏิมณฺฑิตานํ จกฺกวตฺติอาทีนํปิ มนุสฺสานํ คนฺโธ โยชนสเต ฐิตานํ เทวานํ กณฺเฐ อาสตฺตกุณปํ วิย พาธติ.

[๔๑๖] ปุน ปาณาติปาตาทิปญฺจสีลานิ สมาทาย วตฺเตนฺตานํ วเสน วทติ. ตาวตึสานนฺติ อิทญฺจ ทูเร นิพฺพตฺตา ตาว มา อาคจฺฉนฺตุ, อิเม กสฺมา น เอนฺตีติ วทติ.