aññantaṃ pucchāma tadiṅgha brūhī"ti

ādīsu upayogavacane. "aṭṭhānametaṃ bhikkhave anavakāso, yaṃ akissā lokadhātuyā"tiādīsu karaṇavacane. Idha pana bhummeti daṭṭhabbo. Tena vuttaṃ "yasmiṃ kappe"ti. Udapādīti dasasahassīlokadhātuṃ unnādento uppajji.

Bhaddakappeti pañcabuddhuppādapaṭimaṇḍitattā sundarakappe sārakappeti bhagavā imaṃ kappaṃ thomento evamāha. Yato paṭṭhāya kira amhākaṃ bhagavatā abhinīhāro kato, etasmiṃ antare ekakappepi pañca buddhā nibbattā nāma natthi. Amhākaṃ bhagavato abhinīhārassa purato pana taṇhaṅkaro medhaṅkaro saraṇaṅkaro dīpaṅkaroti cattāro buddhā ekasmiṃ kappe nibbattiṃsu. Tesaṃ uparimabhāge ekaṃ asaṅkheyyaṃ buddhasuññameva ahosi.