[10] Sāvakasannipātaparicchede vipassissa bhagavato paṭhamasannipāto caturaṅgiko ahosi, sabbe ehibhikkhū, sabbe iddhiyā nibbattapattacīvarā, sabbe anāmantitāva āgatā, iti te ca kho paṇaṇarase uposathadivase. Atha satthā vījaniṃ gahetvā nisinno uposathaṃ osāresi. Dutiye tatiye ca eseva nayo. Tathā sesānaṃ buddhānaṃ sabbasannipātesu. Yasmā pana amhākaṃ bhagavato paṭhamabodhiyāva sannipāto ahosi, idañca suttaṃ aparabhāge vuttaṃ, tasmā "mayhaṃ bhikkhave etarahi eko sāvakānaṃ sannipāto"ti aniṭṭhapetvā "ahosī"ti vuttaṃ.

Tattha aḍḍhaterasāni bhikkhusatānīti purāṇajaṭilānaṃ sahassaṃ, dvinnaṃ aggasāvakānaṃ parivārāni aḍḍhateyyasatānīti aḍḍhaterasasatāni. Tattha dvinnaṃ aggasāvakānaṃ abhinīhārato paṭṭhāya vatthuṃ kathetvā pabbajjā dīpetabbā. Pabbajitānaṃ pana tesaṃ mahāmoggallāno sattame divase arahattaṃ patto. Dhammasenāpati pañṇarasame divase gijjhakūṭapabbatamajjhe sūkarakhātaleṇapabbhāre bhāgineyyassa dīghanakhaparibbājakassa sajjite dhammayāge vedanāpariggahasuttante desiyamāne desanānusārena anubujjhamānañāṇaṃ pesetvā sāvakapāramīñāṇaṃ patto. Bhagavā therassa arahattappattiṃ ñatvā vehāsaṃ abbhuggantvā veḷuvane paccuṭṭhāsi. Thero "kuhiṃ nukho bhagavā gato"ti āvajjento veḷuvane patiṭṭhitabhāvaṃ ñatvā sayaṃpi vehāsaṃ abbhuggantvā veḷuvaneyeva paccuṭṭhāsi. Atha bhagavā pāṭimokkhaṃ osāresi. Taṃ sannipātaṃ sandhāya bhagavā "aḍḍhaterasāni bhikkhusatānī"ti āha. Ayaṃ sāvakasannipātaparicchedo nāma.