Pariyesanā pana kāyavācāhi pariyesanāyeva. Sā kāyavacīsamācāraggahaṇena gahitāpi samānā yasmā ājīvaṭṭhamakasīlaṃ nāma etasmiṃyeva dvāradvaye uppajjati, na ākāse. Tasmā ājīvaṭṭhamakasīladassanatthaṃ visuṃ vuttā. Tattha na sevitabbapariyesanā anariyapariyesanāya kathetabbā. Sevitabbapariyesanā ariyapariyesanāya. Vuttaṃ hetaṃ:- dvemā bhikkhave pariyesanā anariyā ca pariyesanā, ariyā ca pariyesanā. Katamā ca bhikkhave anariyapariyesanā? idha bhikkhave ekacco attanā jātidhammo Samāno jātidhammaṃyeva pariyesati, attanā jarādhammo, byādhidhammo, maraṇadhammo, sokadhammo, saṅkilesadhammo samāno saṅkilesadhammaṃyeva pariyesati.

Kiñca bhikkhave jātidhammaṃ vadetha. Puttabhariyaṃ bhikkhave jātidhammaṃ, dāsīdāsaṃ jātidhammaṃ, ajeḷakaṃ jātidhammaṃ, kukkuṭasūkaraṃ jātidhammaṃ, hatthigavāssavaḷavaṃ jātidhammaṃ, jātarūparajataṃ jātidhammaṃ, jātidhammā hete bhikkhave upadhayo, etthāyaṃ gadhito mucchito ajjhāpanno attanā jātidhammo samāno jātidhammaṃyeva pariyesati.