อรรถกถาบาลี อักษรไทย
อรรถกถาบาลี อักษรโรมัน
อรรถกถาบาลี อักษรไทย
สพฺพพุทฺธานํ จ อายุเวมตฺตํ ปมาณเวมตฺตํ กุลเวมตฺตํ ปธานเวมตฺตํ รสฺมิเวมตฺตนฺติ ปญฺจ เวมตฺตานิ โหนฺติ. อายุเวมตฺตํ นาม เกจิ ทีฆายุกา โหนฺติ, เกจิ อปฺปายุกา. ตทา หิ ทีปงฺกรสฺส วสฺสสตสหสฺสํ อายุปฺปมาณํ อโหสิ, อมฺหากํ ภควโต วสฺสสตํ อายุปฺปมาณํ.
อรรถกถาบาลี อักษรโรมัน
Sabbabuddhānaṃ ca āyuvemattaṃ pamāṇavemattaṃ kulavemattaṃ padhānavemattaṃ rasmivemattanti pañca vemattāni honti. Āyuvemattaṃ nāma keci dīghāyukā honti, keci appāyukā. Tadā hi dīpaṅkarassa vassasatasahassaṃ āyuppamāṇaṃ ahosi, amhākaṃ bhagavato vassasataṃ āyuppamāṇaṃ.
อรรถกถาบาลี อักษรไทย
ปมาณเวมตฺตํ นาม เกจิ ทีฆา โหนฺติ, เกจิ รสฺสา. ตถา หิ ทีปงฺกโร อสีติหตฺโถ อโหสิ, สุมโน นวุติหตฺโถ, อมฺหากํ ปน ภควา อฏฺฐารสหตฺโถ.
อรรถกถาบาลี อักษรโรมัน
Pamāṇavemattaṃ nāma keci dīghā honti, keci rassā. Tathā hi dīpaṅkaro asītihattho ahosi, sumano navutihattho, amhākaṃ pana bhagavā aṭṭhārasahattho.
อรรถกถาบาลี อักษรไทย
กุลเวมตฺตํ นาม เกจิ ขตฺติยกุเล นิพฺพตฺตนฺติ, เกจิ พฺราหฺมณกุเล. ปธานเวมตฺตํ นาม เกสญฺจิ ปธานํ อิตฺตรกาลเมว โหติ, ยถา กสฺสปสฺส ภควโต. เกสญฺจิ อทฺธนียํ ยถา อมฺหากํ ภควโต.
อรรถกถาบาลี อักษรโรมัน
Kulavemattaṃ nāma keci khattiyakule nibbattanti, keci brāhmaṇakule. Padhānavemattaṃ nāma kesañci padhānaṃ ittarakālameva hoti, yathā kassapassa bhagavato. Kesañci addhanīyaṃ yathā amhākaṃ bhagavato.
อรรถกถาบาลี อักษรไทย
รสฺมิเวมตฺตํ นาม สุมงฺคลสฺส ๒- ภควโต สรีรรสฺมิ ทสสหสฺสีโลกธาตุปฺปมาณา อโหสิ. อมฺหากํ ภควโต สมนฺตา พฺยามมตฺตา. ตตฺร รสฺมิเวมตฺตํ อชฺฌาสยปฏิพทฺธํ. โย ยตฺตกํ อิจฺฉติ, ตสฺส ตตฺตกํ สรีรปฺปภา ผรติ. สุมงฺคลสฺส ปน นิจฺจํปิ ทสสหสฺสีโลกธาตุํ ผลตูติ อชฺฌาสโย อโหสิ. ปฏิวิทฺธคุเณสุ ปน กตฺถจิ ๓- เวมตฺตํ นาม นตฺถิ.
อรรถกถาบาลี อักษรโรมัน
Rasmivemattaṃ nāma sumaṅgalassa bhagavato sarīrarasmi dasasahassīlokadhātuppamāṇā ahosi. Amhākaṃ bhagavato samantā byāmamattā. Tatra rasmivemattaṃ ajjhāsayapaṭibaddhaṃ. Yo yattakaṃ icchati, tassa tattakaṃ sarīrappabhā pharati. Sumaṅgalassa pana niccaṃpi dasasahassīlokadhātuṃ phalatūti ajjhāsayo ahosi. Paṭividdhaguṇesu pana katthaci vemattaṃ nāma natthi.