[๔] ตตฺถ ยํ วิปสฺสีติ ยสฺมึ กปฺเป วิปสฺสี. อยญฺหิ "ยนฺ"ติ สทฺโท "ยํ เม ภนฺเต เทวานํ ตาวตึสานํ สมฺมุขา สุตํ สมฺมุขา ปฏิคฺคหิตํ, อาโรเจมิ ตํ ภควโต"ติอาทีสุ ๒- ปจฺจตฺตวจเน ทิสฺสติ.

"ยนฺตํ อปุจฺฉิมฺห อกิตฺตยิ โน

อญฺญนฺตํ ปุจฺฉาม ตทิงฺฆ พฺรูหี"ติ ๓-

อาทีสุ อุปโยควจเน. "อฏฺฐานเมตํ ภิกฺขเว อนวกาโส, ยํ อกิสฺสา โลกธาตุยา"ติอาทีสุ ๔- กรณวจเน. อิธ ปน ภุมฺเมติ ๕- ทฏฺฐพฺโพ. เตน วุตฺตํ "ยสฺมึ กปฺเป"ติ. อุทปาทีติ ทสสหสฺสีโลกธาตุํ อุนฺนาเทนฺโต อุปฺปชฺชิ.