Eko pana "divase divase upaṭṭhātuṃ ko sakkoti, uppanne kicce parakkamena ārādhessāmī"ti kuppite paccante raññā pahito parakkamena sattumaddanaṃ katvā ṭhānantaraṃ pāpuṇi. Yathā so, evaṃ viriyadhurena lokuttaradhammanibbattako veditabbo.

Eko "divase divase upaṭṭhānaṃpi urena sattisarapaṭicchannampi bhāroyeva, mantavasena ārādhessāmī"ti khettavijjāya kataparicayattā mantasaṃvidhānena rājānaṃ ārādhetvā ṭhānantaraṃ pāpuṇi. Yathā so, evaṃ cittadhurena lokuttaradhammanibbattako veditabbo.