@5 cha.Ma., i. andubandhanādīni. 6 i. khaṇḍākhaṇḍāni. 7 i. dhotatambalohamalaṃ.

@8 i. pakkhantā nāvā. 9 cha.Ma. sakatejobhāsitāni, i. sakatejobhāsabhāsitāni. Avīcimhi aggi nibbāyi. Lokantaresu āloko udapādi. Nadījalaṃ nappavatti. Mahāsamudde madhuraṃ udakaṃ ahosi. Vāto na vāyi. Ākāsagatā pabbatarukkhagatā sakuṇā bhassitvā paṭhavīgatā ahesuṃ. Cando ativirocati. Suriyo na uṇho, na sītalo, nimmalo utusampanno ahosi. Devatā attano attano vimānadvāre ṭhatvā apphoṭanaselanacelukkhepādīhi mahākīḷanaṃ kīḷiṃsu. Cātuddisikamahāmeghopi vassi. Mahājanaṃ neva khudā na pipāsā pīḷesi. Dvārakavāṭāni sayameva vivariṃsu. Pupphūpagaphalūpagarukkhā pupphaphalāni gaṇhiṃsu. Dasasahassīlokadhātu ekadhajamālā ahosi.

Tatrāpissa dasasahassīlokadhātukampo sabbaññutañāṇapaṭilābhassa pubbanimittaṃ. Devatānaṃ ekacakkavāḷe sannipāto dhammacakkappavattanakāle ekappahāreneva sannipatitvā dhammapaṭiggahaṇassa pubbanimittaṃ. Paṭhamaṃ devatānaṃ paṭiggahaṇaṃ catunnaṃ rūpāvacarajjhānānaṃ paṭilābhassa pubbanimittaṃ. Pacchā manussānaṃ paṭiggahaṇaṃ catunnaṃ arūpajjhānānaṃ paṭilābhassa pubbanimittaṃ. Tantibaddhavīṇānaṃ sayaṃ vajjanaṃ anupubbavihārapaṭilābhassa pubbanimittaṃ. Cammabaddhabherīnaṃ vajjanaṃ mahatiyā dhammabheriyā anusāvanassa pubbanimittaṃ. Aṭṭabandhanādīnaṃ chedo asmimānasamucchedassa pubbanimittaṃ. Mahājanassa rogavigamo catusaccapaṭilābhassa pubbanimittaṃ. Jaccandhānaṃ rūpadassanaṃ dibbacakkhupaṭilābhassa pubbanimittaṃ. Badhirānaṃ saddasavanaṃ dibbasotadhātupaṭilābhassa pubbanimittaṃ. Pīṭhasappīnaṃ javasampadā catuiddhipādapaṭilābhassa pubbanimittaṃ. Jātijaḷānaṃ samālapanaṃ catunnaṃ satipaṭṭhānānaṃ paṭilābhassa pubbanimittaṃ. Videsapakkhandanāvānaṃ supaṭṭanasampāpuṇanaṃ catupaṭisambhidādhigamassa pubbanimittaṃ. Ratanānaṃ sakatejabhāvobhāsitattaṃ yaṃ lokassa dhammobhāsaṃ dassessati, tassa pubbanimittaṃ.