[312] Abbhuggacchīti abhiuggacchi. Tadā kira manussānaṃ "na brahmunā saddhiṃ mantetvā sakkā evaṃ sakalajambūdīpaṃ anusāsitun"ti nisinnanisinnaṭṭhāne ayameva kathā pavattittha. Na kho panāhanti mahāpuriso kira "ayaṃ mayhaṃ abhūto vaṇṇo uppanno, vaṇṇuppatti kho pana na bhāriyā, uppannassa ca vaṇṇassa rakkhanameva bhāriyaṃ, ayaṃ ca me acintetvā amantetvā karontasseva vaṇṇo uppannova, cintetvā mantetvā karontassa pana vitthārikataro bhavissatī"ti brahmadassane upāyaṃ pariyesanto taṃ disvā sutaṃ kho pana me tanti ādimetaṃ parivitakkesi.

[313] Yena reṇu rājā, tenupasaṅkamīti evameva antarā daṭṭhukāmo vā sallapitukāmo vā na bhavissati, tato chinnapalibodho sukhaṃ viharissāmīti palibodhūpacchedanatthaṃ upasaṅkami, esa nayo sabbattha.

[316] Sādisiyoti samavaṇṇā samajātikā.