Imā ca pana ādito paṭṭhāya kathitā. Sabbadhammatā sabbabodhisattānaṃ hontīti veditabbā.

Davattiṃsamahāpurisalakkhaṇavaṇṇanā

[33] Addasā khoti dukūlacumbiṭake nipajjāpetvā ānītaṃ addasa. Mahāpurisassāti jātigottakuladesādivasena mahantassa purisassa. Dve gatiyoti dve niṭṭhā dve nipphattiyo. Ayañhi gatisaddo "pañca kho imā sāriputta gatiyo"ti ettha nirayādibhedāya sattehi gantabbagatiyaṃ vattati. "imesaṃ kho ahaṃ bhikkhūnaṃ sīlavantānaṃ kalyāṇadhammānaṃ neva pajānāmi āgatiṃ vā gatiṃ vā"ti ettha ajjhāsaye vattati. "nibbānaṃ arahato gatī"ti ettha paṭisaraṇe. "apica tyāhaṃ brahme gatiñca pajānāmi, jutiñca pajānāmi `evaṃ mahiddhiko bako brahmā"ti ettha nipphattiyaṃ vattati. Svāyamidhāpi nipphattiyaṃ vattatīti veditabbo. Anaññāti aññā gatinipphatti nāma natthi.