@7 cha.Ma. bhoggavaṅkaṃ 8 cha.Ma., i. pacchā Suddhāvāsakhīṇāsavabrahmehi attano ānubhāvena rathassa puratova dassitaṃ, taṃ purisaṃ passitvā. Suddhāvāsā kira "mahāpuriso paṅke gajo viya pañcasu kāmaguṇesu laggo, satimassa uppādessāmā"ti taṃ dassesuṃ. Evaṃ dassitaṃ ca taṃ bodhisatto ceva passati sārathi ca. Brahmānopi hi bodhisattassa appamādatthaṃ sārathissa ca kathāsallāpanatthaṃ taṃ dassesuṃ. Kiṃ panesoti eso jiṇṇoti. Kiṃ vuttaṃ hoti, nāhaṃ bho ito pubbe evarūpaṃ addasanti pucchi.

Tenahīti yadi mayhaṃpi evarūpehi kesehi evarūpena ca kāyena veditabbaṃ, tenahi samma sārathi. Alandānajjauyyānabhūmiyāti "ajja yaṃ uyyānabhūmiṃ passissāmā"ti gacchāma, alaṃ tāya uyyānabhūmiyāti saṃviggahadayo saṃvegānurūpaṃ āha. Antepuraṃ gatoti itthījanaṃ visajjetvā sirigabbhe ekakova nisinno. Yatra hi nāmāti yāya jātiyā sati jarā paññāyati, sā jāti dhiratthu dhikkatā atthu, jigucchā nāmesā jātīti jātiyā mūlaṃ khaṇanto nisīdi paṭhamena sallena hadaye viddho viya.

[45] Sārathiṃ āmantāpetvāti rājā kira nemittakehi kathitakālato paṭṭhāya ohitasoto vicarati, rājā so "kumāro uyyānaṃ gacchanto antarāmagge nivatto"ti sutvā sārathiṃ āmantāpesi.

Byādhitapurisavaṇṇanā