อิมา จ ปน อาทิโต ปฏฺฐาย กถิตา. สพฺพธมฺมตา สพฺพโพธิสตฺตานํ โหนฺตีติ เวทิตพฺพา.

ทวตฺตึสมหาปุริสลกฺขณวณฺณนา

[๓๓] อทฺทสา โขติ ทุกูลจุมฺพิฏเก ๒- นิปชฺชาเปตฺวา อานีตํ อทฺทส. มหาปุริสสฺสาติ ชาติโคตฺตกุลเทสาทิวเสน มหนฺตสฺส ปุริสสฺส. เทฺว คติโยติ เทฺว นิฏฺฐา เทฺว นิปฺผตฺติโย. อยญฺหิ คติสทฺโท "ปญฺจ โข อิมา สาริปุตฺต คติโย"ติ ๓- เอตฺถ นิรยาทิเภทาย สตฺเตหิ คนฺตพฺพคติยํ วตฺตติ. "อิเมสํ โข อหํ ภิกฺขูนํ สีลวนฺตานํ กลฺยาณธมฺมานํ เนว ปชานามิ อาคตึ วา คตึ วา"ติ ๔- เอตฺถ อชฺฌาสเย วตฺตติ. "นิพฺพานํ อรหโต คตี"ติ ๕- เอตฺถ ปฏิสรเณ. "อปิจ ตฺยาหํ พฺรเหฺม คติญฺจ ปชานามิ, ชุติญฺจ ปชานามิ `เอวํ มหิทฺธิโก พโก พฺรหฺมา"ติ ๖- เอตฺถ นิปฺผตฺติยํ วตฺตติ. สฺวายมิธาปิ นิปฺผตฺติยํ วตฺตตีติ เวทิตพฺโพ. อนญฺญาติ อญฺญา คตินิปฺผตฺติ นาม นตฺถิ.

ธมฺมิโกติ ทสกุสลธมฺมสมนฺนาคโต อคติคมนวิรหิโต. ธมฺมราชาติ อิทํ ปุริมปทสฺเสว เววจนํ. ธมฺเมน วา ลทฺธรชฺชตฺตา ธมฺมราชา. จาตุรนฺโตติ ปุรตฺถิมสมุทฺทาทีนํ จตุนฺนํ สมุทฺทานํ วเสน จาตุรนฺตาย ปฐวิยา อิสฺสโร. วิชิตาวีติ วิชิตสงฺคาโม. ชนปโท อสฺส ๗- ถาวริยํ ถิรภาวํ ปตฺโตติ ชนปทตฺถาวริยปฺปตฺโต. จณฺฑสฺส หิ รญฺโญ พลิทณฺฑาทีหิ โลกํ ปีฬยโต มนุสฺสา