Vipassissa bhagavato ekaratanāyāmā vidatthivitthārā aṭṭhaṅgulubbedhā suvaṇṇiṭṭhakā kāretvā cūḷaṃsena chādetvā vihāraṭṭhānaṃ kīṇiṃsu. Sikhissa suvaṇṇayaṭṭhiphālehi chādetvā kīṇiṃsu. Vessabhussa suvaṇṇahatthipādāni kāretvā tesaṃ cūḷaṃsena chādetvā kīṇiṃsu. Kakusandhassa vuttanayeneva suvaṇṇiṭṭhakāhi chādetvā kīṇiṃsu. Konāgamanassa vuttanayeneva suvaṇṇakacchapehi chādetvā kīṇiṃsu. Kassapassa suvaṇṇakaḷīhiyeva chādetvā kīṇiṃsu. Amhākañca bhagavato salakkhaṇānaṃ kahāpaṇānaṃ cūḷaṃsena chādetvā kīṇiṃsu. Ayaṃ vihārabhūmiggahaṇe paricchedo.

Tattha vipassissa bhagavato tathā bhūmiṃ kīṇitvā vihāraṃ katvā dinnaupaṭṭhāko punabbasumitto nāma ahosi, sikhissa bhagavato sirivaḍḍho nāma, vessabhussa sotthiyo nāma, kakusandhassa accuto nāma, konāgamanassa uggo nāma, kassapassa sumano nāma, amhākaṃ pana bhagavato sudatto nāma. Sabbecete gahapatimahāsālā seṭṭhino ahesunti. Ayaṃ upaṭṭhākaparicchedo nāma.

Aparāni cattāri avijahitaṭṭhānāni nāma honti. Sabbabuddhānaṃ hi bodhipallaṅko avijahito, ekasmiṃyeva ṭhāne hoti. Dhammacakkappavattanaṃ isipatane migadāye avijahitameva hoti. Devorohaṇakāle saṅkassanagaradvāre paṭhamapādagaṇḍitā avijahitāva hoti. Jetavane gandhakuṭiyā cattāri mañcapādaṭṭhānāni avijahitāneva honti, vihāro pana khuddakopi mahantopi hoti, vihāropi na vijahatiyeva. Nagaraṃ pana vijahati. Yadā nagaraṃ pācīnato hoti, tadā vihāro