Tattha sakko devānamindo yebhuyyenapi piyaṅgudīpamahāvihārasmiṃyeva pavāreti. Sesā devatā pāricchattakādīni dibbapupphāni ceva dibbacandanacuṇṇāni ca gahetvā attano attano manāpaṭṭhānameva gantvā pavārenti. Evaṃ pavāraṇāsaṅgahatthāya sannipatanti.

Devaloke pana āsāvatī nāma latā atthi. Sā pupphissatīti devā vassasahassaṃ upaṭṭhānaṃ gacchanti. Pāricchattake pupphamāne ekavassaṃ upaṭṭhānaṃ gacchanti. Te tassa paṇḍupalāsādibhāvato paṭṭhāya attamanā honti. Yathāha:-

"yasmiṃ bhikkhave samaye devānaṃ tāvatiṃsānaṃ pāricchattako koviḷāro `paṇḍupalāso hoti, attamanā bhikkhave devā tāvatiṃsā tasmiṃ samaye honti `paṇḍupalāso dāni pāricchattako koviḷāro, na cirasseva dāni chinnapalāso bhavissatī'ti. Yasmiṃ bhikkhave samaye devānaṃ tāvatiṃsānaṃ pāricchattako koviḷāro chinnapalāso hoti, jālakajāto hoti, khārakajāto hoti, makulakajāto hoti, korakajāto hoti. Attamanā bhikkhave devā tāvatiṃsā tasmiṃ samaye honti `korakajāto dāni pāricchattako koviḷāro na cirasseva sabbaphāliphullo bhavissatī'ti

sabbaphāliphullassa kho pana bhikkhave pāricchattakassa koviḷārassa samantā paññāsa yojanāni ābhā phuṭā hoti, anuvātaṃ yojanasataṃ gandho gacchati, ayamānubhāvo pāricchattakassa koviḷārassā"ti.