Tattha yadā rājāno adhammikā honti, tadā uparājā senāpati seṭṭhī sakalanagaraṃ sakalaraṭṭhaṃ adhammikameva hoti. Atha tesaṃ ārakkhadevatā, tāsaṃ devatānaṃ mittā bhummā devatā, bhummadevatānaṃ mittā ākāsaṭṭhakadevatā,

@3 i. jīvi. evamuparipi 4 Sī. bakkulatthero

@5 cha.Ma., i. uparājāno, 6 cha.Ma. bhūmaṭṭhadevatā 7 cha.Ma., i. tāsaṃ devatānaṃ Ākāsaṭṭhakadevatānaṃ mittā uṇhavalāhakā devatā, tāsaṃ mittā abbhavalāhakā devatā, tāsaṃ mittā sītavalāhakā devatā, tāsaṃ mittā vassavalāhakā devatā, tāsaṃ mittā cātummahārājikā devatā, tāsaṃ mittā tāvatiṃsā devatā, tāsaṃ mittā yāmā devatāti evamādi evaṃ yāva bhavaggā ṭhapetvā ariyasāvake sabbe devā brahmaparisāpi adhammikā honti. Tāsaṃ adhammikatāya visamaṃ candimasuriyā pariharanti, vāto yathāmaggena na vāyati, yathāmaggena avāyanto ākāsaṭṭhakavimānāni khobheti, vimānesu khobhitesu devatānaṃ kīḷanatthāya cittāni na namanti, devatānaṃ kīḷanatthāya cittesu anamantesu sītuṇhabhedo utu yathākālena na sampajjati, tasmiṃ asampajjante na ca sammā devo vassati, kadāci vassati, kadāci na vassati, katthaci vassati, katthaci na vassati, vassanto pana vappakāle aṅkurakāle nāḷakāle pupphakāle khīraggahaṇādikālesu yathā yathā sassānaṃ upakāro na hoti, tathā tathā vassati ciraṃ vigacchati ca, tena sassāni visamapākāni honti vigatagandhavaṇṇarasādisampattīni ekabhājane pakkhittataṇḍulesupi ekasmiṃ padese bhattaṃ uttaṇḍulaṃ hoti ekasmiṃ atikilinnaṃ ekasmiṃ sampākaṃ, taṃ paribhuttaṃ kucchiyaṃpi tīhākārehi gacchati. Tena sattā bahavābādhā ceva honti appāyukā ca. Evaṃ tāva utubhojanavasena āyu hāyati.